推普機剷到屋企門口，七成小學推行普教中，香港政府千方百計貶抑粵語，令部分香港人萌生捍衛自己語言嘅決心。但面對龐大嘅國家機器同功利搵食嘅港人，好容易令人感到灰心。

就如沈旭輝所講，香港面臨嘅一個問題，係國際上嘅日趨孤立。中國不停貶低香港嘅國際地位，689政府又熱衷「内交」，官方有意放棄國際化，下下都向中共献媚。呢啲嘢我哋似乎控制唔到，唯有靠民間努力，廣交朋友。喺普世價值上，我哋當然要爭取西方文明國家嘅注意。咁文化呢？我第一個諗起嘅，係廣東廣西。

香港同兩廣嘅聯繋已及唔上以前

香港以前係移民社會，充滿住儒家社會式嘅「宗親會」。去舊區行一轉，抬頭就會見到一堆乜乜同鄉會嘅招牌，以兩廣通福建為多。呢啲組織為飄流香港嘅同鄉提供喺香港嘅照應及人際網絡，以及同故土文化嘅紐帶。

隨住香港七十年代以來嘅本土化漸趨深入，同鄉會嘅意義喺新一代逐漸淡薄，香港人嘅族群意識崛起，「籍貫」同變成陌生虛詞，「鄉下」嘅故土情懷亦不復見。香港嘅新一代，逐漸同兩廣呢個文化類近嘅朋友漸行漸遠。佢哋大多數對鄰近地區缺乏了解，往往視對方做非我族類，一頂「強國人」嘅帽子笠晒全部。佢哋唔知道廣西好多人識講粵語（廣東話）；唔識分各地嘅粵語口音；亦冇嘗試過去了解大家有咩嘢可以交流合作。我可以話，隨住宗族社會喺香港瓦解，令香港失去好多聯繋。剩番嘅，淪爲建制派蛇齋餅稯動員群眾嘅空殼。

即使係咁，好多人都仍然同我哋同聲同氣。我就我所知，講幾個零散嘅例子畀大家聽。

廣州恆大主場比賽，全場高唱《海闊天空》

香港人見到呢一幕，大概都會感動莫名。廣州人拒絕使用「Guangzhou」，拉起「We Are Canton」嘅橫額，唱來自香港嘅經典歌曲《海闊天空》為本土球隊打氣。佢哋選擇喺自己主場大唱粵語歌，代表一種粵語文化嘅認同。對於呢班朋友，香港人似乎關注欠奉。歸根究底，就係七十年代以後香港流行文化極爲強勢，輻射到全世界粵語社群，但只係單向影響，香港人對對方嘅情況興趣缺缺。廣州球會奪冠嘅盛事，香港人唔好話親身適逢其會，連圍內討論都欠奉。

廣西朋友，屋企申請有線電視

早前同兩廣各地嘅朋友交流，赫然發現佢哋竟然有睇有線同 NOW。原來香港有做地下轉播，佢哋就喺屋企裝機頂盒收睇。價錢仲貴過香港！廣西朋友阿媽屋企長期開住香港電視台，「我都知無線而家啲劇正垃圾！但有乜計，始終喺講我哋白話嘅台，開住得個聽字都好呀。你哋香港政府又唔發牌畀港視，冇好嘢睇！」

兩廣朋友，企喺推普機嘅更前線

早前有廣西有有心人拍咗段短片，講述廣西粵語嘅危機，好多廣西細路因爲洗腦教育抹黑母語做「不文明」，上堂只用普通話，即使父母人堅持講粵語佢哋都唔肯講粵語，只講普通話。影片的確令人揪心，擔心今日廣西，明日香港。係推普嘅大浪潮下，大陸境內最頑強嘅可以話喺粵語。喺廣州好多老師校長，都對普通話教學陽奉陰違，偷偷哋係堂上面轉 Channel，用粵語授課。加上強烈嘅本土意識，導致2010年廣州撐粵語行動。嗰陣嘅香港人，絕大部分對普教中入侵仲係懵剩剩。我發現兩廣人面對強大文化清洗，佢哋努力撐住嘅同時，對香港有一種深切嘅祈望，令我更感膀頭多幾分沉重。

香港流行文化嘅存亡，關乎成個粵語文化嘅傳續

香港流行文化餘輝，係佢哋保留粵語文化嘅希望。我同部分粵語愛好者唔同，我唔會以存古去做粵語嘅招牌，因爲粵語最犀利嘅，在於其創新嘅生命力，帶動成個流行文化嘅輝煌，以致返轉頭鞏固粵語本身嘅地位。我喺大陸百度貼吧觀察網友討論，見到一個好有趣嘅分享：

你可以見到，以前香港流行文化鼎盛嘅八、九十年代，粵語係反攻深圳呢個北佬移民城市，因爲香港電視劇、流行曲、電影等風行華人圈子，甚至令深圳普通話母語嘅後生一輩轉講粵語。去到千禧年後，香港流行文化持續走下坡，失去文化輻射能力，普通話就挾住國家機器長驅直進。每次講到呢樣嘢，兩廣嘅朋友都甚爲唏噓。

我哋，都需要朋友。今日係台灣，明日可以係兩廣嗎？

本土意識崛起前，受大中華思想荼毒嘅香港人，一直討厭台灣搞獨立，或者因爲欠缺認識而膚淺咁講台灣只係另一個大陸。當香港後生大中華意識破滅之後，先意識到寶島嘅可愛之處。我哋互相打氣，因爲我哋有共同嘅地方，擁抱民主自由等價值，保護自身經濟同文化，抗拒大陸入侵。係政治上聯成一綫，互相扶持鼓勵。

而文化上，我哋依然係孤伶伶一個，忘記咗身邊有其它粵語人同我哋有一樣嘅憤慨。無論香港定兩廣，都討厭北方普通話人入侵時嘅嘴臉。我哋叫佢哋「蝗蟲」，兩廣蔑稱佢哋「撈頭」。就算粵桂港文化有差異，未必可以同屋共處，握個手做老友對抗共同敵人亦不失爲美事？過去，我哋冇企埋一齊，某程度係因爲欠缺交流同了解；今日，係唔係應該做啲嘢，伸出友誼之手，唔好再坐困愁城？

最後，送上一首廣州流行曲，《墨爾本的翡翠》畀大家。