寫呢篇文之前，我首先利申，我係好多時都會爆粗。 

今屆香港小姐已經曲終人散，本來大台嘅節目本人唔想講太多，不過因為今年嗰位冠軍因為兩年前雨傘革命喺facebook係咁用粗俗語言鬧梁特首、建制派、＂以胸襲警＂嘅荒謬等等，引來社會一大的熱論。一開始唔少人都好欣賞佢嘅勇氣、直率，又話今年選到位「真。香港小姐」，但係後來又因為佢嘅「少不更事」，結果又惹嚟唔少人鬧佢「為錢為名利跪低」、「虛偽」，又話上一屆冠軍比今年嗰位有風骨等等。其實，關於爆粗，我想講嘅係就算爆粗，咁又點？ 

唔講其他方面，就講我比較熟悉嘅旅遊中嘅點點滴滴。去咗咁多次旅行，一定遇過唔少當地人，接觸過唔少當地語言。仲記得我啱啱喺美國去完嘅summer exchange，遇多咗唔少美國人同台灣人，大家都毫無避忌咁交流自己本土嘅粗口，而且愈講愈hyper。因為好老實講，一個地方嘅粗口正正赤祼祼咁反映自己嘅文化（雖然句句意思都差唔多），而且人類自己本身都會喺自己認為好shit嘅情況下，全球都係咁，無乜咁大不了。而且唔少外國人同我講，喺各種外國語言入面，最通用丶最容易學丶最應該學嘅詞語或短句之中，除咗「你好」之外，就係粗口。因為除咗可以喺適當時機爆粗之外，仲可以知道當地人係咪侮辱緊你。所以話，爆粗，人人都會，有乜大不了。 

 今年嗰位冠軍事後補飛仲話「女仔要斯文啲」，言下之意即係人若要有斯文形象，就唔好爆粗。斯文？唔好玩啦！若果大台真係想維持旗下藝人或者電視台本身所謂純潔形象，就唔會叫Ben Sir上其中一個節目教粗口嘅應用啦！換句說話講，爆粗已經唔係呢個問題嘅癥結，爆粗背後嘅原因先係。今屆港姐冠軍被禁聲，無非都係佢屌得梁特首丶建制派丶黑警大大力，政治立場同大台唔岩，咪可能被「少不更事」囉，你知大台嫁啦，唔聽話，點撈到風生水起！ 

 題外話補充一點，雖則「美貌與智慧並重」，但選港姐無非都係睇樣優先，樣靚，我地就支持佢。但依家香港人就搞到選港姐就好似選議員咁，又問政治立場又問其他。Okay，你地話港姐始終係香港人，我都認為要有一啲政治觸覺係無可厚非。不過依家最諷刺嘅係依家啲人就將選港姐嘅標準套咗落去選議員度，外觀最重要，啲政綱丶理念就置若罔聞。唔怪得今年好多唔知所謂丶政綱唔合乎常理嘅人都贏到議席。所以話當你遇到呢啲人，唔好吝嗇你啲粗口，就要大大力屌落去！ 

 所以話，關於爆粗，我想講嘅係有啲野，比爆粗更加恐怖，更加唔可以接受。 

（TVB截圖）