關於玩具反斗城申請破產保護，我都講兩句先。
首先申報一下，因為某原因，我平均一個星期會去40次玩具反斗城左右，唔算好離譜的數字，另外，以下所講述的數字真係並非真正數字，請視作比喻。
如果問我點解，我一定會覺得因為被夾死，可能好多人會覺得AMAZON或者其他網上途徑會夾死反斗城，又或者其他競爭對手，但我反而覺得真凶另有其人。
首先講AMAZON先啦，無錯，好多時候AMAZON的價錢可能會比反斗城低少少，甚至你更加容易會搵到半價的代用品，但個人覺得AMAZON的購買方式，只是令到父母可以較方便，而並非真係影響到反斗城的盈利。好簡單一樣野，細路買玩具，比起有目的地買某一隻指定玩具，隨機見到，突然心血來潮的機率其實更加多，而要達到呢一件事的發生，首先就要到實體店。當你個細路扭曬計的時候，除非你打算鐵石心腸唔買，否則，除非你打算同個細路講「等陣返屋企，我上AMAZON ORDER比你啦，2日就到。」理論上，應該無乜幾多細路會肯放過你的。所以雖然AMAZON會影響銷售，但始終作為接觸途徑來講，始終係實體店佔優。衹有其他網上商店，等2日的AMAZON PRIME都已經麻煩了，何況你要等1個禮拜。
實體店競爭的確有影響，例如TARGET同WALMART。好實際地，雖然從選擇上來講比起反斗城都要少，但最大的優勢始終都係作為成年人，如果入去反斗城就一定全部都係玩具，但如果入TARGET或者WM，我會有其他野可以買到。而且以統計學來睇，專門帶細路入去反斗城買玩具的發生率一定會比起入WALMART買野，然後順便買埋玩具的發生率要低，而且最重要的係價錢。
OK，基本上美國大部分情況下，所有的商場都會按照MSRP，市場參考價來定價的，所以理論上大家的價錢都差唔多。所以之後的折扣就係重點啦。首先，平均折扣來講，反斗城通常都會減10~15%，然後有時候會有特殊的20%的限定優惠券（平均2~3個月一張，當中大部分情況下唔可以適用於游戲機，LEGO或者其他指定產品）。而其他競爭對手呢？WALMART可能會直接因為自己的大量入貨優勢，經常減10%，雖然無乜優惠券，但就起碼保證大部分時間平過你，TARGET呢？其實我覺得TARGET比較有頭腦，優惠平均10~15%，而且好多時有買特定物品送禮品卡。而呢D禮品卡可以理解成買玩具比細路，然後大人買其他野有優惠，而呢一個做法，令到更加多的成年人會比較樂意在TARGET買玩具，
之後就到核心了，成本與價格。
之前我講過，大部分的玩具都會以MSRP來售賣，而入貨價多少都會再取決於數量的多少。或者全球1200間的反斗城好似好多？TARGET全美國有1800間，walmart全世界有11000間，而零售店的數目當然會影響到入貨的多少，你要得越多貨，當然你的折扣就越多。例如，僅僅是例如。反斗城的批發折扣大概係65%左右，而TARGET大概都係62%。但WM就可以去到60%了。而呢個數字會影響折扣率的多少，所以WM先可以常時做10%。 而另外一個問題就係，賣唔曬的玩具點算好？同一般細店唔同，大CHAIN通常可以RETURN FOR CREDIT。但當然會有損耗同比率啦例如，WM可以退一批貨最多65%，而價錢損失係10%左右。TARGET係63%，損失12%左右。但以我所知，反斗城因為係玩具專門店，所以似乎只可以有40%的退貨，而且折損大概15%。正因為呢一D數字上的分別，導致好多反斗城其實會壓好多舊貨，而周轉率都遠遠要比其他的競爭對手要低。
僅僅因為以上原因？錯，其實仲有。
例如某H財團會同反斗城講，你想要專賣產品啊？OK，無問題，首先某一個係你要同我食多某一個數字貨，然後再幫我食多一個唔受歡迎的專賣系列，我就可以考慮下了，唔明？乾脆講得直接啲，如果你反斗城要賣變形金剛大師系列的鋼鎖，你就要幫我食埋電影玩具，多20%。之後再食半透明特別版。係咪比較容易理解呢？無錯，或者專賣系列有其魅力所在，但除非係獨立產品，否則真係無想像中咁歡迎，所以到最後都係食曬啲死貨，而且專賣品退貨數目同折損率都要比一般更加差，所以當大家見到反斗城好多專賣產品的時候，其實都要嘆一口氣了。
而且還有熱銷品的問題，其實玩具公司好多時候都會大概知道一件產品好唔好賣，例如之前MARVEL LEGEND的道具系列，可以的話，你估反斗城唔想拿多啲來賣咩？但實際上，每間店平均只有10件左右，但同時每一定的數量都要另外搭3.75或者6吋系列，所以教大家睇一樣野，如果你見到你附近的反斗城突然有好多奇怪的玩具有莫名奇妙大量的存貨，可能就係因為以上原因了。
其次，死貨的問題都係十分嚴重。但呢個問題的罪魁禍首其實係某H財團同M財團。又以變形金剛為例了，你一箱DELUXE 8隻，入面有4隻大黃蜂係乜玩法？唔好同我講受歡迎，因為到最後周街都係大黃蜂坐曬響度。結果return for credit… 然後重新裝返落下一批次的配貨，而其他的玩具其實都有類似的問題，結果搞到來來去去都係死貨。不過反斗城唔同奇趣，唔可以個別減死貨的價，結果又係打回頭。但某H財團依然有錢賺。以上規律適合基本上H,M,B 3個財團。
其實你問我，我會話，美國反斗城一直都有嘗試改變，例如有專門開闢成人向收藏區，或者賣新系列，不過，最噩夢的時間就發生了，你要賣SHF嘛，好，某H財團會同你講，你原本1箱6吋可以拿多2個IRON MAN頭盔，以後你拿3箱先有一個，完。無錯，當你考慮新的進貨渠道的時候，舊的主要進貨渠道會玩你。又或者當反斗城打算賣高達，搞展示的時候，會突然有人同你講，你今年的變形金剛MP，無啦，我比咗WALMART咯，
那麽真正的壞人係邊個呢？
或者呢個故事入面無絕對壞人，因為作為消費者的一方都有責任。首先解釋下美國反斗城的退貨規則，比起大部分地方的30日，反斗城是採取90日規則，而且由原本的必須退還全新產品亦在最近改變成「接近全新」。 如果你有心，你可以買返屋企，開完，玩完，影完相，再企企理理地退貨。如果你有心，你可以新出第1日就拿返屋企，然後第89日先退。而呢90日，可能就會令到反斗城錯過return for credit，退返原厰的機會了。更無奈的是，其實90日之内，衹要有其中一日，你買的玩具有減價，你就可以直接拿返張收據，然後要求退差額，無論你件玩具是否依然「健在」。
無錯，當好多人怪反斗城不思進取的時候，其實你為自己謀取最大優惠的同時，你都成為了幫凶。
當然，如果你問我，我甚至會覺得反斗城的買手眼光差，請的員工對玩具無愛，甚至連自己究竟賣緊乜都唔知或者某樣玩具大概點玩都完全無概念之類的，反正原因多多，但就結論而言，反斗城已經啓動破產保護，你問我點算？恐怕真係要考慮做成人玩具啦，我講HT或者THREEZERO之類的，但當然，如果我響反斗城度買咗隻R2-D2，之後發現BODY空心，個頭求其之後，90日之內我都會選擇退貨咯，到時，應該又有人會話就係我害死反斗城了。
其實，我自己會見到好多人的親子時間會係阿爸帶住個女去買星戰，或者帶住個仔買變形金剛。或者一開始，反斗城應該更加關注成年人，令到子女眼中的父母可以放下電話，玩下HOT TOYS，然後細路都會更加願意選擇玩具而唔係塊板，當然，自私啲來講，細路，不如你玩返大黃蜂啊？MP限量版請叫俾我來處理，（笑）