我唔想 Umbrella Revolution‬ 快啲完咩？你哋個個有份工，有生意，當然想快的回復正常。

而我，一年來全無收入，就係希望搞得起個 app，而家投資 CALL4VAN 嘅錢已經燒盡，面對糕糕 van 財團銀彈攻勢，收司機月費又遙遙無期，而家仲要咁樣搞一嘢，前期司機義載物資係我自己貼錢，啲客叫車我直情一嘢話冇就收線，即係死得仲快！

至於貨 van 司機，個個都有頭家要養，義載不單止冇錢收，係倒貼埋時間油錢！你估佢哋好想，好過癮？真係有美國派錢都唔錯！

但作為香港人，究竟呢一刻返工搵食重要，還是為自己、為下一代爭取一個公義社會重要？香港人「搞事」，咪就係唔希望霸權肆虐，特首同政府真正向香港人負責，等大家搵食做生意都有個相對合理、公平啲嘅環境？

唔需要幻想，活生生嘅例子，就喺深圳河以北，一樣繁華發達，「只係」每逢教師節要畀錢先生、冇得上 Facebook 要上 QQ 微博、入醫院要收錢先否則唔醫你、車死人冇所謂有錢就搞掂、黑食品毒奶粉都數清咁多。佢哋一樣有工開，一樣有生意做㗎！

最後又有啲人話，抗爭唔一定係好事，可能仲衰添！你睇「佔中三子」班人就知道。但退後一步睇，今次運動已經唔關任何政棍事，係香港人自己領導，自己負責。 我哋要嘅唔係邊個上位、邊個下台，而係公平嘅選舉制度，令政客真正向香港人負責，要立法會廢除功能組別，唔好再喺政策上偏袒權勢壟斷。

講完，有物資請 WhatsApp 我（69904567），如果過多一兩個禮拜，佔領就算完咗，CALL4VAN 都應該會執笠，有工介紹請打畀我。

（本文原載於 CALL4VAN 面書專頁，蒙作者答允轉載。）