成也大班，敗也大班

雖然「DBC復播運動」在運動的後期成功動員了上萬群眾到新政總集會聲援，但並未能改寫DBC停播的命運。就此本文特意邀請了「DBC爭取復播行動運動委員會」成員之一──黎則奮先生（Q仔）接受訪問，探討復播運動失敗的主要原因。

雖然DBC停播事件涉及股東爭拗和商業糾紛，但主因明顯是「西環打壓」和香港言論自由的問題。據Q仔所述，早於九月三十日，大班已經說服DBC上下，說明停播事件並不是簡單的商業糾紛，可是基於政治考慮和大班的個人因素，停播運動的目標定位一直含糊不清。

就這一點Q仔清晰回應︰「十月十號停播之後舉行「義播雲天七日情」，但運動其實只係最尾嗰幾日先正式開始。

本來有啲人認為應該十一號就要開始義播。但我堅持要先停播，因為如果你次次話停播，但次次都播返，人地以為你響度玩……我覺得應該一早成個運動先要轉化，先可以將矛頭指向政府，如果唔係一直只係股東爭拗。停播咗之後，第一個利益受損就係聽眾，之後先到員工同股東……不過，大班對運動有所保留，佢始終有佢自己的顧慮，所以我響呢段期間咪成日逼迫佢囉。

星期五晚集會完咗，我咪同佢響台後嘈囉，好多人聽到架!如嗰嗰晚爆個錄音出嚟，成件事都唔同哂啦，結果迫到佢第二晚先出之嘛。」

當兩段錄音在網上廣泛流傳後，十月二十一日晚上便有七萬多名市民到新政總支持復播，但可惜群眾集會卻以「告别式」宣佈結束，導致復播無望。

Q仔認為運動失敗的主要原因是大班對運動的立場問題，他說︰「大班同我響政治上既睇法完全唔同，佢覺得最終即使搞到幾十萬人上街，政府都唔會讓步。佢就唔信梁振英會轉，覺得中共一定會撐佢……我既政治判斷就係雖然梁振英未必話到事，但同國教問題一樣，個運動搞到咁大，佢話唔撤，但都衰哂啦！不過大班唔信我，佢話我激，二來佢又無咁既膽量。因為佢知道背後既敵人，將矛頭指到去共產黨。佢孭唔起，佢唔會夠膽做!」

Q仔認為大班之所以對運動沒有信心是因為傳媒和他身邊的朋友的冷待，而事實上這亦是導致運動動員群眾失敗的主因，他說︰

「香港好多政客，我唔係抽水，啲政黨都好唔鐘意大班架，因為佢成日抽人水嘛，又成日砌人。二來嗰啲人又覺得搞唔成…響禮拜日嗰個告别式，佢始終唔相信街頭佔領，大班睇到我寫既嘢，佢即刻落台。佢認啊，佢認佢對自己無信心、對人無信心。

因為啲傳媒朋友咁冷待，即係所謂咁多年既政客政黨個個都無support…有啲人又話你係煲呔針、唐營軍師咁……嚟一嚟講兩句，個個都會啦，有幾多個真係去幫個運動？個個都無啦！」

其實，早於復播集會結束前，「保衛香港自由聯盟」已經開始籌備。雖然在缺乏具體的運動目標的情况下，但Q仔卻抱著較為樂觀的態度，因為他認為這樣才標誌著DBC停播事件正式轉化為一個「群眾運動」。

攝:Tony Lam