一開始佔領時，無大會無大台無糾察，人人出心出力，全民互相合作……大家見到有咩可以幫手就自動做，自己見到有人挑機或者有人做可能破壞佔領的事就會主動勸阻，如果有其他行動（例如有人想行動升級或者警察嚟清場），就會以自己常識同可承受的風險決定自己去向……

直至有一班權力唔知由邊到嚟，自稱「佔中糾察隊」的成立。

第一晚就開始四出拆路障，一次又一次俾留守者阻止後，開始用暗的，先偷偷拆索帶，再係大家休息緊的凌晨4:00去搬鐵馬，好彩搬時被留守者發現，仲大吵起嚟，當日媒體都有報道。之後仲唔死心，一日想拆幾十次，令留守者跟本無時間休息，應付糾察仲辛苦過應付防暴！之後有財力的大台就利用佢哋極大聲的音響，滅咗原本各示威者自發的小講台（大台的音響我懷疑開到最大可以傳去全佔領區）。只要晚上8-12開大台期間有其他小講台開咪，大台會再校大聲啲，結果大家只可以俾佢一言堂！大台用大台力量肯定糾察隊的存在，令原本示威區有常識會自動自發的示威者開始唔再主動……見有人挑機，搵人搵糾察啦……見有人用明火煮食，搵人搵糾察啦……自己就置身事外。大台晚晚唱歌搖手機睇電影，金鐘佔領區由抗爭戰場變成 camp site 生活體驗營。堅實的留守者痛心，但盡量都唔同佢哋嘈，繼續守護好可以守護的戰線，仲要防內賊……

點知路西法效應唔單止令警察變公安，仲令糾察變城管！

10月3日旺角打生打死，金鐘大台就喺到開演唱會。而權威效應下，台下的支持者去到完全無常識的地步……以往未有大台，支持者係會主動查詢邊區要人支援再自動各區流動……但嗰晚因為大台宣傳叫所有人返金鐘開大會（演唱會？），結果台下的人完全只沉醉係歌聲下，旺角告急？唱海闊天空舉手機相重要啲。演唱會節目一完，過萬人就直接轉身返屋企……去到糾察阻人凌晨開咪告知金鐘留守者旺角緊急戰情……10月14日龍和告急，糾察阻人吹雞叫支援，仲係大台叫原本想去龍和支援的台下支持者繼續留係台下「集會」！！！！！！喺嗰一刻，我知道金鐘已經失守！城堡果然係由裡面攻破！

而家係金鐘佔領區，糾察係橫行的！

經常出來受訪嗰位糾察長晚晚喺肥佬黎物資站內飲酒，早上時已醉晒，有時仲會凌晨出嚟醉酒鬧事……所以我必須講，前晚佢阻人叫支援，早上指認行動者給警察拉，尋晚拆其他示威者的小講台……我已經完全唔驚訝。因為對我來說，大台根本就係功能組別同狼英政府，晚晚如CCTVB般麻醉支持者意志，糾察根本就係黑警！！！金鐘已經係香港現況的縮影！

大家都係爭民主，唔好嘈？那，大家都係香港人，唔好嘈，唔好要民主，紅黃綠藍一家親吧！

糾察都好辛苦，無功都有勞？那，黑警都好辛苦的，打示威者係應該的。

有人故意分化運動？是誰將示威者分化，令行動者變得孤立？留守者加唔加入行動，可以用自己常識決定，唔需要糾察大台幫大家決定邊個行動應該支援！

如果我哋可以忍受因為要成就表面的和諧，而見到不公義都唔出聲，那所有支持普選的香港人，何不都為咗香港的和諧接受中共的假普選方案？

如果我哋可以接受有特權小圈子幫我哋決定行動參與權，那我哋何不接受有特權小圈子幫我哋決定特首人選？組特權小圈子去爭取取消特權小圈子特首？

 

Are you joking?