TVB膠劇《實習天使》一出，全世界嘅焦點都落喺洪永城嗰句 Facebook 留言「護士，喺社會上嘅地位不高」身上，但其實業界最不滿係劇場太脫離現實。小妹作為一個護士，見到首兩集一系列離奇畫面，一定要CAP低舉出錯處，以正視聽，當然，真係得啖笑，認真就輸了。


個病人體溫得35.4，屬於低溫！點解唔report俾負責護士知？


Sister同你講嘢你雙手插袋！！！你係咪唔想畢業?！


呢個就真係不得了！完美演繹咩叫唔及格嘅洗傷口！作為一個護士你要識分咩叫「乾淨」咩叫「無菌」！點解sister你會擺啲「乾淨」嘅嘢喺車頂架呢？你仲要喺旁邊開set...咁幅set仲點會係「無菌」呢？


Sister你對手套摸過咁多嘢已經唔「乾淨」！你仲要雙手咁拎起個「無菌包」入面嘅嘢！！！咁成份嘢咪污染晒囉！！！


呢幅圖就精彩啦！好清楚咁見到，原先喺車頂只係「乾淨」嘅兩個胃形盤同支消毒藥水，已經企咗係「無菌區」入面！重點！頭先sister將抹過傷口嘅棉花球，拋咗喺車面其中一個胃形盤到！！Sister其實你係咪飲大咗呀？


又係咁…對手套周圍摸完就走去掂啲應該喺「無菌」嘅嘢…同埋…你隻左手點解要掂個盤呢！！！


呢班人頭先明明由警車送嚟…點解一去到急診室就無晒呢？！同埋…急診室唔係有保安架咩？！


嗱！！我真心欣賞呢個sister~！！佢唔單止質疑醫生斷錯症！仲可以直接走去顧問醫生間房，而顧問醫生又真係睬佢啵！


若希BB就不得了啦！佢做唔成護士可以去做髮型師！返工前條馬尾好直架喎，一開工條馬尾就攣咗！去到放Tea條馬尾又忽然直返！一放完Tea就即刻攣返啦！媽呀！好亂吖。
P.S.呀高材生…出實習係要紮髻架。


呢幕真係超爆！！其實咁近醫院，點解唔抱佢去急症室呢？！同埋麗香BB又暈又嘔又休克，就算條衛生棉真係主因，咁難道啲金葡菌又會咁乖企定定喺原位等你捉！而俾你捉到個病人就可以即刻醒返？！簡直神跡一樣！


呢個就深少少，真係要行內人先知。點解個病人MEWS會一直係0分！！根據上面張圖佢明明間中心跳都會過100/min，咁點解個MEWS會一直都係0…點解！！！


雖然個畫面幾浪漫，我都好欣賞呢位sister...不過…sister你可唔可以解釋吓點解你可以著住套制服離開咗醫院範圍，而你係on緊duty架喎。

（實習天使截圖）