諮詢會有幾個人掟野，毓民講句掟汽油彈，有人就覺得民情開始升溫，示威愈來愈激進，報紙又話暴動邊緣……係就好囉……

根本上，會狙擊諮詢會，嚟嚟去去嗰人，會衝擊嘅，唔係熱血公民，就係社民連。你哋以為民情好激？如果你唔係透過垃圾報道嚟接觸世界，你近日有落場示威，你就知，今日激進派聲勢，同早兩年根本冇得比。

政改啦喎！應該好多人爭取普選架喎？如果香港人真係想要普選，早就有咗啦！依家諮詢緊，尐人根本連諮詢文件都未睇過，人地話「公民提名」佢又講，要「公民提名」就要「全民制憲」佢又唔明喎。港共唔跟基本法，根據喬曉陽講話嚟立法，整個「機構提名」咁離譜，都冇人理，甚至冇人報道。

暴動邊緣？實情係好多政黨愈搞愈縮，我掟野俾人拉嗰日，現場好激？你哋自己落嚟睇下啦！成個諮詢會場得四個反對聲音，拉咗三個！場外呢？愛港力愈來愈多人，就嚟多過反對派示威者啦，你地又知唔知？

政改諮詢，依家就擺明強姦你，個局勢就只係抗爭一途，但係參與抗爭嘅人愈來愈少，一個二個走去商討，傾咁耐都仲係傾緊個原則……然後搶購個粗口公仔影張相，當自己向極權講左粗口……但係抱住粗口公仔影相嗰尐人，又成日譴責人講粗口喎！

全城花生友，姑息689。