大家第一次聽變種呢個名詞應該就係X-Men入面，我地叫狼人、X教授做變種人。
喺戲入面，狼人同X教授雖然係正派，但係處處受到排斥打壓，甚至受政府嘅追殺。
點解會有「排斥」？因為大眾對變種人的天賦能力不了解，所以產生恐懼。
點解要「追殺」？因為政府未遇過變種人，無得抄前例，唔識處理又唔知搵邊個揹飛。
唯有將「未證明到會危害」扭曲做「未知的危害」，冠上「變種」兩個字。
明明班「變種人」可以拯救地球，都當你怪獸追殺咗先！

戲如人生，呢類情況香港都經常發生，你睇番前幾日香港吸煙與健康委員會放出嚟嗰條宣傳片都見到。
就算國際間已經有好多研究證明，電子煙同加熱煙呢類新式煙草產品，比舊式傳統煙危害較低。
政府一於話之你，佢講到電子煙同加熱煙嘅時候，用嘅係「變種煙」，而唔係「改良煙」。
明明所謂嘅「變種煙」可以幫到煙民，都被當你怪獸，真係十足十X-Men。

X-Men畀柳臣嘅啟示係，「變種」根本係妖魔化異類嘅敍述，變種人嘅煉成正正係政府通過文字上嘅再現建構出嚟嘅敵人。
直接啲講，妖魔化咗你之後追殺你，令佢可以借此避免咗認真去討論變得好唔好呢個問題。
因為無論戲裡戲外，理性討論說服人都唔係政府擅長嘅手腕，直接DQ你，咪最方便簡單完事囉！

鬼唔知食煙無益咩，但如果「變種」之後嘅加熱煙，係二手煙少啲，釋放嘅致癌物少咗，咁呢個「變種」就叫做「進化」啦！

有無「變種人」、「變種煙」根本係一個偽名題，「變種」之後好唔好？點樣令件事變得更好，先係值得探討嘅問題。

（無煙宣傳片「煙禍變種繼續害人」截圖）