唔經唔覺原來《大香港早晨》就快做咗800集！回想起當初參加咗棟篤生活訓練班，跟住就自薦做主持，原來三年時間，我自己都做咗差不多300集。諗返起第一次做節目非常緊張，擔心資料準備唔夠、擔心講錯嘢、擔心呢樣嗰樣。喺呢三年裏面要5點幾起身，化好妝去到studio，呢一樣野係少數我可以堅持做到3年嘅事。有時都同自已講，不如call sick，因為真係好眼訓，外面又好凍，但做大香港，唔係玩玩下。我係有責任，有使命，仲要同拍擋同聽眾交代。

記得有一段時期，我做節目表現差，做得唔好，畀好多人鬧。有留言話一聽到我做節目就熄機。我好認真咁去思考，我咁廢，不如唔好做，但我真係好鍾意做節目，就算要走都唔要比人鬧走，咁走得咁肉酸。咁我就將啲唔開心呑左落肚，咬實牙關繼續做。咁就三年，每次開咪前都仍然會緊張，因為每次開咪都一樣咁重要。

加入《大香港早晨》以來，其中最深刻嘅經歷必定係雨傘革命。仲記得927我哋喺海富中心外通宵留守，928戰場由政總蔓延到街頭。之後嘅每一個早上，街頭上演嘅《大香港早晨》成為抗爭者每日接收前線資訊嘅重要渠道。雖然個段時間我就長駐金鐘，比較少參與，但仍然感受到這個早晨節目對前線抗爭者嘅重要。當時主流傳媒一面倒抹黑抗爭者，《熱血時報》就肩負起傳遞資訊同導正輿論嘅責任。當其時，真係揸住支咪就有人聽我講野，而我唔單單代表自己，因為我當時講嘅每句說話都代表《熱血時報》，更加體會到媒體影響力大，因此絕對唔能夠辜負抗爭者。雨傘革命雖然最後失敗，但係由呢個失敗嘅經驗當中，更加覺得《大香港早晨》乃至《熱血時報》喺同極權鬥爭所擔當嘅位置係幾咁重要。

抗爭路途艱難，當我地感到挫敗同難受，加上大環境的政治氣氛，而令無力感更重，我地就更加要謹記，教育群眾、深耕細作的工作常未完成。而一齊去改變世界嘅夢想一日未成，未來就仍要不斷進步，努力爭取聽眾嘅肯定同支持。

加入《熱血時報》絕對係我人生中其中一個重要決定，喺呢個團隊，我認識到一生對我最重要嘅人。《熱血時報》喺改變世界嘅同時，亦都改變左我。多謝老闆黃洋達創立《熱血時報》，我趁著800集呢個機會，感謝大亨嘅鞭策同埋聽眾嘅支持。晨早起床雖然辛苦，不過捱過這些苦楚，我地嘅努力，總可以在絕處開花結果。

Christine Wong課金Link：http://www.passiontimes.hk/?view=raise&host=Christine%20Wong


2014年4月17日首次亮相

---------------------------------------------------

香港最重要的早晨節目《大香港早晨》即將於3月17日，迎接800集。節目經歷許多難關，但憑住一眾台前幕後的竭力製作與堅持，以及大家支持。

《大香港早晨》終於迎來第800集，成為網台歷史上重要的一頁！

「大香港800集大典」
日期：3月18日（星期六）
時間：8:00 – 9:00 PM
地點：KOOL http://www.kooleader.com/
地址：荔枝角長順街15號D2 Place 二期1樓110-111號舖
價錢：每位$280

名額有限，快啲報名喇！

有意報名請循以下報名方法報名：
1）親臨九龍灣臨興街美羅中心II期609室報名
或
2）點擊以下報名連結：
http://www.passiontimes.hk/?view=regform36