熱血時報 | 無天理!幫咗人仲要畀人唱!

無天理!幫咗人仲要畀人唱!



無天理!幫咗人仲要畀人唱!



今日發生咗件事,我決定力陳己見,請大家一齊嚟評下理。

中一嘅時候,我隔籬位個同學叫阿偉。佢一向都唔多出聲,而且成日耷低頭寫嘢,所以我同佢都無乜點講嘢。直到有一日放學,我經過麵包舖,見到老闆捉住阿偉對手,鬧佢:「死賊仔!偷嘢?我要報警拉你!」我見到阿偉隻手仲抓住一個腸仔包。

我唔忍心,就衝入去同老闆講:「老闆,佢係我同學嚟,你放過佢啦。」老闆話:「放咩放,個個都偷嘢仲得了,我要報警。」說罷就拎起電話要打。我連忙按住佢隻手,話:「老闆,佢得個十二三歲,未成年㗎,拉佢都未必判到佢罪,你都唔想又要上差館又要落口供㗎係咪?到時咪盞阻住你開舖做生意。一係咁,我代佢賠十倍錢畀你,佢以後唔敢㗎啦。你做下好心啦。」老闆諗咗兩秒,就話:「好啦!下次唔好畀我再捉到你!」跟住接過我畀佢嘅錢,放咗阿偉。

因為呢件事,阿偉就同我多兩句計傾。原來佢父母好爛賭,賭到阿偉成日無飯開,嗰日佢實在太餓先偷麵包食。我有啲同情佢,因為我屋企都窮,同病相憐之下,我時不時都將自己個飯盒分一半畀佢食。雖然搞到我自己都有啲餓,但係次次 lunch 食飯嘅時候佢坐我隔籬望住,我又唔忍心唔分畀佢。次次食完 lunch,我通常都落去操場打波,而阿偉就會拎佢本拍紙簿出嚟寫嘢,當時我係唔知佢寫咩嘅。

我同阿偉同班咗三年,到中四就讀唔同班,分咗班之後我哋都無咩聯絡。直到中五暑假,我攤喺屋企午睡嘅時候,我阿媽拎住份報紙入嚟叫我:「喂,你識唔識呢個黃家偉㗎?報紙寫佢同你同校同級個喎。」我一睇,就正正係阿偉,原來佢寫咗篇長篇科幻小說參加一個全港小說創作比賽,奪得冠軍。原來佢成日耷低頭寫嘢,就係喺度寫小說。咁耐無聯絡,我又唔好意思打畀佢,於是 send 咗個 SMS 恭喜佢,但佢無回覆我。算啦,人紅就唔識人,都好正常嘅。我都無點放喺心上。

跟住落嚟嘅大半年,阿偉嘅身影頻頻喺傳媒出現。好多出版社爭住搵阿偉出書,仲有導演睇中咗阿偉嘅長篇科幻小說,要將佢拍成電影,而阿偉將會獲得巨額酬勞。到咗今日,我揭開報紙,見到阿偉接受訪問,當記者問佢有咩難忘嘅人生經歷嘅時候,阿偉答:「中一嘅時候我屋企好窮,我試過去麵包舖偷麵包。咁啱當時坐我隔籬位嘅同學經過,佢聽到老闆鬧我係賊仔之後,佢望住我嘅眼神,好明顯係不屑同埋鄙視,佢嘅嘴角帶有一絲幸災樂禍嘅恥笑,呢個屈辱同埋精神上嘅折磨,我呢一生都唔會忘記。難道人窮,就唔配擁有夢想嗎?我同自己講,我要出頭,我唔要再被人睇唔起。」

家陣我真係嬲到就嚟爆喇,我幾時有眼神鄙視佢、恥笑佢?我幾時有睇唔起過佢?佢係咪寫科幻小說上腦,幻想我精神折磨佢?當年我幫咗佢,仲分一半飯比佢食,我都從來無要求過咩回報,家陣佢竟然走嚟唱衰我?大家評下理喇,你哋話呢個人係唔係不知所謂?


延伸閱讀:
【老駱:大陸Betty,你係賊嚟架咋,八婆】
http://www.passiontimes.hk/article/04-16-2014/13966


(圖片來源:tien-Yu Wu via Flickr


作者
讀者回應