（第一回重溫：暑期工陷阱；第二回重溫：傳銷大揭秘）

上次講到，無知少女（i.e. 我）去咗上咗一間美容公司，做所謂「問卷調查員」，實際上即係傳銷公司。

我同一班啱啱考完會考嘅中學雞喺公司嗰度互相 Role-play 一吓，你扮路人，我就做問卷調查員，and vice versa。當然啦，自己人 Role-play 路人，成件事會易好多。即使我扮路人嗰時，刻意刁難對方，講幾句「哎呀唔好意思我唔得閒呀」，只要對方扮吓嘢講兩句「好快㗎咋，兩分鐘就做完」，然後就會答應做問卷。
當然，問卷只係前菜，最重要係 Sell 對方買 Facial Coupon。Sell 到一張，就有$60。

當時嘅我只係心郁郁，好想快啲落街 Sell coupon！一個鐘 Sell 到兩張，都有$120/hr!

好快我哋就換好制服，齊齊離開公司，行去尖沙咀金馬倫道HSBC門外空地。Senior 嗰啲就 Set counter 擺放物資（未又係啲問卷、Coupon 同埋 Form），我地呢啲細嘅就拎張問卷同 Coupon 攔截路人……

「小姐，請問你……」
「小姐，你好呀！請問……」
「小姐，有無時間……」
「小姐，你面色好差wor!」

莫講話 Sell Coupon，連半份問卷都做唔到。無論用咩句子，啲路人都係直行直過。有啲好心嘅，可能見我個樣細個，以為我係做啲濕鳩 Project 所以停低，但當我一問佢「你最近有啲咩皮膚煩惱呢」，啲人通常都會 Hea 下咁話「無wor」。我唔知係因為佢真係覺得自天生麗質定係 feel 到我會 Sell 嘢。

當我以為已經問咗一個鐘嘅時候，望一望錶，只係過咗十五分鐘。時間就係咁無情，當你上緊堂呀返緊工呀嗰時，會特登行慢啲；同愛人BB拍拖、同兄弟一場90分鐘嘅波，時間行得特別快，眨吓眼就過。

叫人做問卷真係好煎熬，好 Frustrate，尤其係一份都做唔到嗰時，我唔想白白咁返去……我好驚畀啲Senior話我做唔到嘢。我望向個 Counter，見到HSBC門外面企咗一個女仔，似係等緊人。

係wor，問嗰啲等緊人嘅人，應該比較易落手！

我行埋去，同樣嘅開場白，估唔到佢好快就應承咗幫我做問卷！

「Sure! No problem!」

個女仔叫 Michelle 戴住眼鏡，個樣斯斯文文，而且講中文都有明顯 Accent，一問之下原來佢喺 Pearl 度做記者。不過我估佢唔似係主播，可能係做出去採訪嗰啲。

結果，出乎意料地順利，佢好爽快好 Nice 咁同我分享佢嘅皮膚問題，我諗佢應該唔知我目的其實只係 Sell Coupon。

Rachel（Rachel係邊個？自己睇返上一集啦）見我問得咁順利，就由 Counter 行過嚟幫手 Sell Michelle 買 Coupon。最初 Michelle 好似都唔係好願意，但 Rachel 不愧係老手，係咁講到個深海魚子 Facial 有幾抵有幾神奇，$190試做$500嘅Facial wor! 最後 Michelle 似係唔想煩，就拎銀包畀咗$190買一張 Coupon。

就係咁，我開咗單，賺咗人手第一筆錢，$60。但係，我不快樂。

Rachel 讚咗我幾句，話我做得幾好，叫我 Keep up，但我感覺一啲都唔好。雖然係明買明賣，但係總係感覺好似呃咗人咁。我開始懷疑，到底自己係咪做緊一啲啱嘅嘢？遊說人地買一啲原來佢無意欲去買嘅嘢，到底係咪欺騙？甚至，我連個 Facial 係咪真係有效都唔知，我又唔係咩美容顧問，如果對方做完 Facial 皮膚敏感咁點算？之後我都無乜心機，Hea hea地扮吓嘢就算。

終於過咗漫長嘅個半鐘，我地成 team 人上返 Office。不過，原來仲未完。話明係傳銷，間公司嘅目標，唔止係路人，仲有我地。


（待續）

（圖片來源：Iyhon Chiu via Flickr）