根據網典，「80後」一詞係喺2010年初開始喺香港流行，嗰陣時社會已經好鍾意將八十年代出生嘅年輕人形容為「反叛、自我中心、懶散、無責任感」。鬧吓鬧吓，今年已經係2014年，呢四年已經將前小半嘅80後推咗上三字頭，但係到今時今日，都仲有傳媒攞「80後」嚟消遣，無嘢搵嘢嚟講。

例如80後大學畢業生要求萬一蚊人工，《明報》引述人力資源顧問話佢哋心頭過高。《大公報》又搵大學教授分析，指出大學生嫌棄地盤、洗碗等體力工作，所以失業。咁好啦，聽你哋支笛啦，啲大學畢業生就走去做基層工作。首先唔好講《蘋果》大字標題冷嘲熱諷「大學生搶老看更飯碗」，現實係做基層工作當然賺得基層工資，又要畀家用又要還學費又要撘車食飯，大家生活喺香港都知車費、買餸幾貴㗎啦，咪唯有同父母住囉，但經濟日報又話你「青年戀家到何時？」斥責年輕人「不願面對成長獨立的責任，只顧眼前享樂」。

但係得份洗碗工看更工又點樣負擔房租呢？又唔准戀家，只好去申請公屋。呢個時候《晴報》又有教授出嚟講：「公屋本來為基層而設，大學生申請不利個人及社會發展。」喂，頭先大公報唔係有個大學教授話大學生唔應該嫌棄地盤、洗碗呢啲基層工作咩？咁而家大學生如你哋所願做咗基層工，申請基層福利又有咩唔啱呢？唔通拎張沙紙去洗碗可以收高啲人工咩？我睇唔透。

有人話，嘿，佢哋廢啫，如果讀書叻做醫生搵到錢，咁咪唔會跌入上面個陷阱囉。錯啦，早幾日《晴報》介紹一位80後醫生，佢月入六萬，又唔會大花筒。係咪好完美呢？點知都被個港大學系主任話：「缺乏社交生活和不懂與人相處。」嘩，係咪夾硬咗啲呀？我唔想同你講嘢唔代表我係啞，佢唔鍾意出外應酬啫，唔代表唔識同人相處㗎嘛？我聞到少少「欲加之罪，何患無辭」嘅味道囉。

跟住又有人話，咁啲80後乾脆唔好讀大學，直接做藍領咪唔會被人批評囉。但係《晴報》又報道咗一位無讀大學嘅80後裝修師傅，佢月賺萬五儲一萬，諗住儲起啲錢買樓；佢咪又係同上面個醫生一樣，被人話佢為咗儲錢唔去應酬，失去好多人脈！喂，咁佢一去應酬呀，又要使錢啦，又無咁快買到樓啦，到時《經濟日報》咪又追問佢戀家到何時！仲要叫裝修師傅開源，將假期時間一半攞埋嚟做兼職喎，做裝修唔辛苦唔使抖㗎？真係唔知笑好定喊好。

我嘅結論係，對傳媒嚟講，80後做咩都係錯嘅，點都要攞啲嘢嚟批評嘅，不論佢哋讀唔讀大學、打唔打基層工、人工高唔高、應唔應酬、儲唔儲錢都好。其實咁多嘢好報，點解仲要攞80後嚟消遣呢？尋日城市論壇，台上眾嘉賓多番論述又唔見你哋詳細報道吓？三句唔埋兩句又講80後，你哋唔厭我都厭啦。

 

延伸閱讀：
【李卓人城市論壇的五宗罪】
http://www.passiontimes.hk/article/06-08-2014/16055

【六四港台論壇：曾焯文黃洋達立足本土，支聯會李卓人氣急敗壞】
http://localpresshk.com/2014/06/64-forum-rthk/

（《晴報》網站截圖）