我知我知，你哋最鐘意話咩依家尐後生，淨係識對住部手機，每分每秒都機不離手，然後借機話我地唔長進，不思進取、唔成熟、唔識同人溝通、一無事處、無責任心……

講起我就扯火。我想問，對住手機有咩問題先？等車唔望手機唔通望住尐狗巴噴廢氣？你地係咪真係咁多幻想，覺得低頭一下就世界末日咁？最礙耳就係每次地鐵播個句「搭扶手電梯唔好慣住望住手提電話，記住緊握扶手～～」，我就未見過有人聽到之後真係乖乖地將視線望向前方，因為隻手捉住個扶手同對眼望住部手機根本就係可以同步進行，個句「溫馨提示」係咪有少少無聊？

你哋最鐘意就話我地打機，浪費哂光陰去轉珠，好應該溫下書。喂你知唔知轉珠係食腦game嚟架？諗下放咩咭做隊長搭四個隊員、part個最信得過既好友組隊、倍攻定根性、壓血定純色定雜色、死咗值唔值得爆石復活，全部都要經過精密嚴謹嘅科學計算，讀精算都未必識計。特別係打超地獄級，更要開個wiki拎埋cal機篤一篤先開始打，訓練頭腦有效過計100條數。個尐師奶最愛又可以無限復活嘅腦殘糖果game簡直冇得比。

係，我知道我哋每日係花好多時間喺度碌Facebook。除左有尐囡囡自拍相令平淡嘅一日增添色彩外，最重要係有D咩重大事情發生，我哋都可以係Facebook第一時間見到朋友share。乜你哋冇發現，次次你哋同我講「知唔知有單新聞……」嘅時候，我都喺前一日就已經知道哂來龍去脈架啦咩？Facebook上面唔單止有最新嘅新聞update，有時仲會有尐page去恥笑下主流傳媒嘅中文水平，例如「暫未知女嬰性別」呢尐為人詬病嘅笑話。甚至有唔少網民會指出報紙有失實或者偏頗嘅報導，至少Facebook係唔會河蟹任何題材嘅新聞（貼bam圖另計）。如果話傳媒係發揮緊第四權角色，Facebook上嘅網民就係香港嘅第五權，負責監察主流傳媒嘅一舉一動，將不公義事情共諸於世，為民發聲。

當你哋以為印刷媒體先係最公平公正，然後淨係識睇自稱「公信力第一」既全港中小學御用教科書《明報》，我地就打開非主流傳媒網站睇最真實最零距離嘅社會評論。當你哋食飯個時沉迷於TVB個尐千篇一律嘅宮廷鬥爭、XX狙擊，我哋已經喺Youtube率先睇到未獲發牌既香港電視製作嘅《警界線》。當你哋以為歌手只剩下許廷鏗同阿Mag，其實仲有好多被封殺哋藝人喺度默默努力緊。

到一返到屋企，雖然我就二話不說咁打開部電腦啪啪啪（打字），你估我真係好enjoy呢種流於手指與鍵盤碰撞嘅啪啪啪？之不過學校比嘅功課，老師懶得辨認個尐打哂風既字，依家都唔叫我哋手寫功課，咩都用電腦做算啦，仲可以用電腦對埋答案，慳返改簿時間。由小學嘅每日一篇，到中學既e-class，大學既essay同group project，全部都要用電腦做。如果比我有得揀，我都想用紙筆做assignment，你估我唔知對電腦對得多對隻眼唔好咩？以前教育電視話對電腦15分鐘就要望下遠嘢，依家有人咁樣做的話我諗比人笑到面都黃，仲要搵所謂「遠嘢」？望出窗外，我估遠極只係得對面大廈個客廳，連半個天都見唔到。

也許，如果天不那麼灰、噪音不那麼多、面前少一點不堪入目的人和事，我們也會願意抬頭望一下這個世界。只是，我們寧願沉醉於那4.3吋屏幕的虛擬世界，因為你們都不知道，那世界比起你們眼中的現實世界，更像真、更現實。

（圖片來源：WSJ）