熱血時報 | 「無限期」絕食爭取甜品

「無限期」絕食爭取甜品



「無限期」絕食爭取甜品


尋日我見餓餓地,就去樓下間西餐廳食飯。間餐廳門口寫住話食午市套餐會有雪糕做甜品,咁我食完個主菜,見到老闆行過,就問佢:「老闆,係咪有雪糕做甜品㗎?」

老闆答:「雪糕唔好㗎,又蛀牙又肥,乖,食糉啦。」

我心諗你都忽忽地,就答:「我唔要糉,要雪糕。」

呢個時候,隔籬檯個林師奶搭嘴:「佢唔會畀雪糕你食㗎啦,你聽佢話啦,食糭咪一樣,都係食物之嘛!」

老闆:「係囉,一係咁,我整啲雲呢嗱味嘅糭你食啦!再唔係就朱古力味嘅糭,要咩味都可以有商有量,總之就無雪糕!唔好諸多要求啦,你睇吓周圍啲客,個個都係食普通嘅糭㗎咋。」

有個坐喺我後面張檯,貌似自由行嘅顧客(腳邊仲有個大篋)插嘴:「 可笑的冰淇淋我們不稀罕雖然我們沒有!」我望一望佢,見佢已經食到成口都係糭。

自由行隔籬坐咗個牧師,佢見我望過嚟,趁機加把口話:「有雪糕食都唔一定係好事,你睇吓幫襯隔籬街間雪糕店啲人,食雪糕食到又痾又嘔!

聽完佢哋講嘢,我擰返個頭返嚟,先發現老闆唔知幾時已經行開咗,換成個侍應企喺我面前。

侍應:「要求食雪糕等於爭取天國來臨,係不切實際嘅!」

我:「嘩阿叔,乜你講啲嘢同林師奶咁夾嘅?你咁講係咪想暗示食糭先實際呀?」

侍應:「唔係,我哋員工都係爭取午市套餐要有甜品嘅!糭都唔係甜品嚟嘅!」

我:「你會點爭取法呢?辭職唔撈?

侍應:「我哋要堅持走和平理性非暴力非粗口嘅路線,用愛與和平感動老闆,辭職啲咁激進嘅嘢我哋係唔會做嘅!我哋已經開始無限期絕食,打算以誠意感動老闆。」

嘩,乜成間餐廳上下啲人都古古怪怪嘅?我最憎食糭,於是就拎起部電話,諗住打畀做律師嘅朋友,問吓餐廳門口寫咗雪糕,但係佢畀糭我,可唔可以告佢。正當我搵緊朋友個冧把嘅時候,我見到頭先個侍應阿叔竟然坐低放飯。

我:「阿叔,你又話無限期絕食爭取甜品嘅?而家老闆肯供應甜品啦咩?」

侍應:「我血糖低,要停止絕食。而且,我已經打破咗我上次絕食嘅紀錄,仲有同事接力絕食,所以可以食返嘢。」佢一路講,一路食,對眼仲盯住佢部iPad入面啲性感寫真相。

呢個時候老闆走出嚟問侍應:「喂阿仁,四月中我哋休息兩天,全店員工一齊去上海,你去唔去?」

阿仁:「去呀去呀!我最鍾意就係食蟹粉小籠包同紅燒獅子頭㗎喇!」

我睇住佢哋有講有笑,覺得自己啱啱睇咗一場超級荒唐嘅鬧劇。但最奇怪嘅係,我望吓周圍嘅顧客,佢哋個個都低頭邊食嘢邊玩手機,有啲仲喺度自拍,好似無乜人理會咁。唔通剩係我先覺得呢單嘢好滑稽?究竟係佢哋唔正常定係我唔正常呢?

(完)

鳴謝鎮棠先生提供「糭與雪糕」之比喻,並提議小妹寫成文章。


(圖片來源:Chris Hsi via Flickr

 

English version of this article is available:
http://hkcolumn.blogspot.com/2014/04/wing-unlimited-duration-of-hunger.html


作者
讀者回應