中國嘅內需係虛浮，一直只有外需，呢點香港及日本人最清楚；

中國嘅樓市亦係虛浮，中國建造嘅樓房數量足夠全亞洲人居住，鬼城處處；

中國嘅農業生產力嚴重不足，多種原料及食品需要進口；

中國嘅製造業開始步入衰退，成本愈來愈高，外資工廠撤離；

中國嘅工業生產力一直過剩，中共每年都需要進行行業補貼及整合。

一個經濟體系嘅基礎全部虛浮，但每年仍能交出7-8%經濟增長嘅亮麗數字，唯有靠國家建設。搞建設，要有水泥，而中國從2011-2013年三年間所消耗嘅水泥量，超過美國喺整個20世紀嘅水泥總消耗量。喺中國，基建完成後就好快會倒塌，然後新基建就會立即啟動，如此翻一翻，GDP數據就會有增長。中國各地方政府都靠消耗水泥搞基建向中共交數，由小太監主導嘅香港政府當然唔會錯過呢個舔中共菊花嘅好機會，所以香港無論如何都要建三跑、高鐵及大橋。

中國各實體經濟範疇都不穩，但仍要維持老百姓有飯開，否則老百姓生活過唔到，就會同你死過，地方就會出現動盪。而充開大頭鬼嘅強國突然雄不起來，就會製造口實比外國勢力大造文章。如是者，地區亂，老外加鹽加醋，北京政權就會出現內部不穩。中共最怕籠裡雞作反，所以每年都要靠充GDP大頭鬼嚟替自己內部維穩。但基礎建設有其客觀及物理限制，冇可能無止境地起完再拆，拆完再起，但每年要保七保八，如何是好？習近平上台後就提供答案：「中國經濟新常態。」呢個詞彙嘅其中一個意思，就係炮製富有中國社會主義特式嘅經濟泡沫。

截至2014年底，中國貨幣累積總供應量已接近全球總供應量嘅25%，係美國嘅1.5倍。單單去年新增嘅貨幣總量，就超過全球總量嘅一半！既然內需、樓市、農業、製造業及工業喺中國嘅路咁難行，但手上擁有全球四份之一嘅鈔票，那就製造泡沫吧！從2014年8月開始，上証就由2000點左右展開升浪，半年後升至近日嘅4000點，升幅高達一倍。呢段期間，曾經有一個星期連續五日成交額超過一萬億人民幣！

同時，習近平亦搞亞投行及「一帶一路」，將泡沫出口外銷，順道將有如廢紙嘅人民幣帶到國際。如是者，老百姓沉迷炒股，黨內就集中借反貪進行清黨及權鬥，愛國五毛就對住亞投行及「一帶一路」天天手槍打個不亦樂乎。大家各有各忙，唔會有人費神搞實業。

喺香港，做生意捱貴租叫苦連天，年青人創業但畀唔起舖租，打工仔人工近乎冇加過，公屋居屋上數又遙遙無期，物價又飛升，點算好？獅子山下精神就係同舟人無畏無懼一起發夢，理想一起去追。港交所已經連續兩日成交超過2000億，下個交易日，等緊你一齊邁進「富有中國社會主義特式既經濟泡沫」裡追尋理想。

（本文原載於作者面書，蒙作者答允轉載。）

（圖片來源：聯合財經網）