做香港男人真係好慘。

喺香港，男人出去工作，女人做家庭主婦，唔會有人質疑。女人工作男人做主夫呢？幾多批評都有。換句話講，女人搵到錢，就係女強人、就係巾幗不讓鬚眉；女人唔搵錢呢？都唔緊要，女人被男人養係應該嘅。男人搵到錢，就係理所當然嘅事，有咩咁特別？男人搵唔到錢呢？就係餓死老婆瘟臭屋。但從來都唔會有人話女人餓死老公瘟臭屋。

講完做嘢，不如又講下食飯。男女出去食飯，男人請客係老奉嘅。如果女人要求AA制，就係體諒人嘅好女人；男人要求AA制呢，就被人唱係cheap男。個情況係嚴重到，就算嗰對男女係普通朋友，或者係一大班男女，如果啲男人唔請客，有時都會有人話呢啲男人係cheap。

男人對女人嘅付出，被香港社會認為係應份嘅。從來，女人同男人講「你成日都無時間陪我，我要同你分手」係唔會有人質疑，有啲仲會話飛得好，「you deserve better」；反之，男人同女人講「你成日都無時間陪我，我要同你分手」呢？嘩，咁大個男人使唔使咁小器呀？扮咩嘢吖，你一定係出面有第二個先用呢個藉口分手，正一賤男。女人要求男人付出，對方做唔到就分手係無問題，但男人要求女人付出，對方做唔到就分手，個男人就唔單止係小器咁簡單，仲要連誠信都一併被人質疑。換言之，女人要求男人付出就天經地義，掉返轉男人你係唔可以要求女人付出嘅。

更加唔好提嗰啲，女人被非禮就人人得以誅之，男人被非禮就「有女人摸你係你有賺」；酒吧推出「Lady's Night」就無人有意見，酒店推出「男士能量下午茶」，仲要女人都食得，都要被婦團批評。女人係天生有特權嘅，如果佢哋願意放棄部份特權就係皇恩浩蕩，要謝主隆恩，男人無權利就係應份，莫講話唔可以計較女人無時間陪佢，就連最基本嘅被人非禮，都無權嗌蝕底。

所以做香港男人係好慘嘅。香港嘅男人，責任多多，但係權利就不合乎比例地少。日本女人喺外面要畀面子男人（返到屋企係點就另一回事），唔會好似香港男人咁被人公然呼呼喝喝。菲律賓男人唔做嘢被老婆養，係好正常。阿拉伯國家嘅男人可以娶四個老婆。香港男人呢？以上種種咩都無之餘，到頭來仲要被人訓示做男人唔好咁計較，要有風度。

我無話做香港女人唔慘，女人都有佢哋嘅難處。但係，為女人抱不平嘅團體甚至網絡文章都比比皆是；反觀男人，有責任無權利之餘仲要不被體諒，連最基本嘅呻下都會被人鬧斤斤計較、無出息。因此，我決定幫佢哋出返句聲。香港呢個社會，對男人實在過份苛刻了。


（圖片來源：Gavid Bowy via Flickr）