熱血時報 | 日本吉野家謎之企劃 連鎖食店一呼百應組《外食戰隊》

日本吉野家謎之企劃 連鎖食店一呼百應組《外食戰隊》



日本吉野家謎之企劃 連鎖食店一呼百應組《外食戰隊》



話說日本吉野家早前在官方Twitter提起一個「廢棄企劃」,內容係打算搵五間肉食相關企業,組成一隊架空戰隊《企業戰隊 肉連者》(企業戦隊ニクレンジャー)做宣傳。下場當然係成個Project打回頭,理由係食店之間作為競爭對手,無人覺得會搵到五間公司陪你癲囉!



7月6日吉野家將呢個準備拎去堆填嘅計劃擺上Twitter,諗住當係話題消遣下,點知無幾耐另一連鎖餐廳Gusto(ガスト)就覆機,話要做「戰隊紅」(因為招牌logo都係紅色呀)。過幾日仲響官方Twitter出埋「Gusto紅」(ガストレッド)嘅角色圖,認真快手。


吉野家見有人應機落搭,即刻都跟隊整返個「吉野家橙」(ヨシノヤオレンジ),畢竟招牌係橙色嘛。


一石激起千重浪,外國勢力肯德基都加入戰團,揀咗捧住桶雞嘅「肯德白」(ケンタホワイト),仲響Twitter話係Gusto拉佢落水喎。


之後就到摩斯漢堡推出「摩斯綠」(モスグリーン),仲係女角添。條裙係咪生菜嚟?


最估你唔到係吉野家直接對手之一,又係賣牛肉飯嘅松屋都玩埋一份,變身成「松屋黃」(松屋イエロー)壓軸登場,真係敵人都可變隊友。


戰隊終於湊齊五人喇!正式名稱叫《外食戰隊 肉連者》,可喜可賀可喜可賀。


你以為咁就完?天真!日本便利店三大龍頭之一,賣炸雞扒都出晒名嘅FamilyMart現身,殺出身穿黃白直間包裝袋,下身著住條老牛嘅「全家炸雞連者」(ファミチキレンジャー)。到底是敵是友呢?但拎炸雞會戴手套,至少係注意衛生嘅。


有戰隊就梗係要安排宿敵,專門出體重磅同埋健康管理器材嘅企業TANITA又唔介意做壞人,出tweet誠徵畫師繪製「瘋狂科學家TANITA博士」插圖。跟住到花王旗下保健飲品系列Healthya(ヘルシア)出聲,話要支援TANITA做邪惡組織幹部,飲咗同牌子飲品仲識巨大化。果然出街食飯最大敵人就係健康...咦?好似有啲嘢撈亂咗...



戰隊角色就基本齊全,仲可能陸續有嚟,之後有咩可以做呢?搖滾樂隊SPYAIR日前出tweet想負責外食戰隊主題曲,不過作曲家渡邊沙志就先下手為強,無幾耐已經曲詞demo寫好晒,仲自己唱埋。



其實日本大企業會唔會容許宣傳部自把自為玩crossover呢?我都唔知。不過大家睇完Happy,各大企業Twitter又多人留意動向,真相「秘而不宣」都係種美德呀。

(圖片:日本吉野家Twitter)


作者
讀者回應
相關文章