我覺得呢件「台灣八達通事件」，突顯到波多野結衣大方得體，台灣政客不知所謂。

事情大概係咁嘅：台灣嘅「八達通」悠遊卡公司，為左刺激卡嘅銷量，搵左波多野結衣，去做左兩張特別版卡嘅封面。部份收益會用作慈善用途。之後政界以「教壞細路」為由，杯葛呢張卡。8月31號，台北市長柯文哲表示會停售兩款波多野結衣悠遊卡。

（1）波多野結衣係台灣嘅真正身分係電影明星

話呢張卡會「破壞社會善良風俗」，係杯葛呢張卡嘅主要論點。

我就覺得好奇怪。兩張卡嘅封面，都只係印咗波多野結衣個樣上去。就張卡本身而言，充其量都只係印咗個女人嘅樣上去（仲要係好靚嗰隻）咁解。點解咁都會破壞到「社會善良風俗」呢？

反對嘅聲音好可能會話：因為波多野結衣係 AV 女優！

呢個論調，真係奇怪！點解台灣嘅政界團體會話波多野結衣係 AV 女優呢？呢句說話，啱一半、錯一半。從台灣嘅官方角度睇，波多野結衣嘅身分，應該係電影明星，唔係 AV 女優。此話何解？波多野結衣喺台灣正式發行過嘅商品，應該只有一套叫《沙西米》嘅台資電影。波多野結衣嘅 AV 電影，係只限喺日本國內發行，唔外銷嘅。換言之，台灣唔應該認識到波多野結衣嘅另一面 -- AV女優。我哋而家搞清楚，波多野結衣係台灣嘅真正身分，其實只係一個電影明星之後，咁人地台灣而家叫一個電影明星做代言，仲有咩問題？

反對嘅聲音可能會馬上撲出嚟，咁樣反駁上面嘅觀點：喺台灣，有邊個唔知波多野結衣係 AV 女優？！

咁我地又要問：點解台灣人人都知？

反對者：有邊個未睇過？

我：睇過？點睇？台灣有得買架咩？

反對者：……

我：不如等我幫你答啦。台灣（乃至日本以外地方）主要係靠盜版、非法渠道去睇波多野結衣（因為日本嘅 AV 產品，基本上係唔外銷嘅）。換言之，台灣嚴格上嚟講，係以非法嘅渠道，去認識波多野結衣嘅另一個身分。你班平時攞開波多野結衣著數，免費（非法地）去睇波多野結衣嘅台灣人，而家當人地波多野結衣有正規、正式、合法嘅商品喺台灣上市，馬上就去聲討人地。人之中，你哋都算無恥。張「波多野結衣八達通卡」，又好似平時咁，「免費」送畀你好唔好？

啱啱我幫波多野結衣正咗名。佢喺台灣嘅正式身分，係電影明星，唔係 AV 女優。所以如果用「AV 女優」去攻擊波多野結衣，喺台灣嘅官方角度睇，唔適當。台灣政府係「台灣八達通公司」嘅大股東之一。所以呢件事，應該用官方嘅角度去睇。如果用呢個角度去睇，用波多野結衣絕對無問題。

（2）請台灣率先支持正版

不過當然，無人會唔知到，唔知波多野結衣係 AV女優。咁我哋又要問，到底搵 AV 女優代言八達通卡，有無問題？

認為有問題嘅人，論點好堅定，佢地會話：「教 壞 細 路 ！」

我意見係：喺台灣，無問題；喺日本，有問題。

波多野結衣喺日本嘅身分，係 AV 女優。如果 AV 女優代言18歲以下都接觸到嘅商品，一般係可免則免。因為要盡量避免有18歲以下人士（過早）接觸到佢哋。

波多野結衣喺台灣嘅身分，唔再係 AV 女優。所以無問題。如果台灣政界仍然堅持有問題，咁即係佢哋承認波多野結衣係 AV 女優。如果係咁，唔該，請佢哋乾脆幫波多野結衣「正名」。請台灣正正式式、正正經經咁引入波多野結衣嘅 AV 產品。合法，光明正大咁喺台灣賣。台灣已經盜取咗人地日本嘅 AV 產品幾十年，一直無人肯正視呢個問題。不如就趁今次機會，開心見誠咁同日本方面傾，另一方面，台灣自己可能要修改法例，容許售賣 AV 產品，同時打擊盜版等等。否則，唔好再話人波多野結衣係 AV 女優，教壞細路云云。你地無資格咁講。

（3）用波多野結衣嘅邊個身分，決定張卡係咪18禁

雖然佢哋無資格講，不過唔代表佢哋講嘅嘢唔啱。如果係一個純粹嘅 AV 女優，佢哋所代言嘅產品，當然係18禁比較恰當。不過，波多野結衣就有啲尷尬。因為佢真係一個跨界別嘅明星：電影明星、AV女優、甚至同時係一個歌手。

用波多野結衣去做呢張「八達通卡」，到底恰唔恰當。我覺得係要視乎出版嘅公司係用波多野結衣嘅邊一個身分去決定。如果佢當波多野結衣係一個電影明星，張卡完全無問題。如果市民大眾覺得有問題（當然佢哋有權咁諗），係市民大眾心邪，錯不在發行嘅公司，更錯不在波多野結衣。而我更加認為，台灣官方，乃至台灣百姓應該要視波多野結衣做電影明星。因為呢個係波多野結衣喺台灣嘅正式身分。

如果台灣間公司係用波多野結衣嘅 AV 女優身分出卡的話。咁，光明正大咁宣布係18禁就可以啦，不必禁賣。而如果係咁，我哋支持波多野結衣嘅人，要另外問呢間公司多一個問題：可唔可以唔好影成咁？

可能仍然會有人話，用 AV 女優會「破壞社會善良風俗」。唉，呢種論調，太迂腐啦。唔好自欺欺人啦，好嗎？AV影片，你要禁，都禁唔嚟。光明正大，承認呢個行業，鼓勵台灣人買正版，還 AV 女優一個公道啦。

（4）波多野結衣係做慈善，唔好屈佢

解決咗波多野結衣嘅身分問題之後。攻擊波多野結衣嘅人，又提出新嘅論點。例如，有人話，如果波多野結衣係真心想做慈善的話，佢就唔應該收錢。而家錢佢已經袋咗，佢仲發聲明話「難道我不能參與善意的活動貢獻於社會嗎？」，係貓哭老鼠、扮可憐、博人同情。

呢種觀點係最無恥、最弱智、最惡毒。

做慈善有好多方法。唔收錢，義演係一種。而事實上，波多野結衣由出道做 AV 女優開始，已經義演咗6、7年畀你哋台灣睇。人地仲要係明知你哋偷睇，不過人哋從來都隻眼開隻眼閉。唔單止無追討過你哋，甚至連呻都未呻過。人地從來都咁慷慨對你哋台灣，你哋台灣而家卻咁樣人身攻擊人地。話人哋博同情，扮可憐。咁，為之無恥。

講返正題，做慈善有好多方法。波多野結衣今次呢種，係售賣個肖像權畀台灣用。然後台灣公司，再利用電影明星波多野結衣嘅人氣，去希望增加佢哋張「八達通卡」嘅銷量。部份收益會作公益用途。波多野結衣收呢啲錢，係天經地義。當然，波多野結衣可以選擇分毫不收，不過無呢個必要。人哋畢竟係大明星，唔需要、無義務作無條件嘅貢獻，去成就呢張卡仔。而台灣公司亦公開講過，當波多野結衣知道係做慈善之後，佢只係收一個好相宜嘅價錢，無開天殺價。點都好，大家雙方嘅最終目的，都係想借呢張卡嘅收益，作慈善之用。只要張卡一開賣，就會有善款。而家呢班蛋散搞到張卡賣唔成，佢地先係破壞呢次善事嘅人。話人哋波多野結衣無做慈善，其實自己先係真正破壞呢次善事嘅人，呢啲為之弱智。

我哋再睇下波多野結衣嘅個人聲明，佢話「難道我不能對於我愛的台灣付出行動來報恩嗎？」喺波多野結衣口中，講「報恩」係咩概念？波多野結衣從來都為台灣「義演」 AV，一個平時已經義務幫開你地嘅人，而家再同你講「報恩」。天下間，實在好難搵到一個人可以咁大方、咁大量。波多野結衣愈大方，就愈反映到人身攻擊波多野結衣嘅人言論惡毒。

（5）教唔教壞細路，視乎你點教，唔係視乎張卡

有婦女團體話，如果個個小朋友都手持一張 AV 女優嘅卡，家長會有咩感想？佢哋可能覺得咁會「教壞細路」（好撚悶啊，我睇咗幾十篇報道，全部都無論點嘅，用來用去都話「教壞細路」）。

我意見係，唔會教壞細路。

有人講過，如果小朋友，特別係女仔，如果見到呢張卡，第時又想做 AV 女優，點算？

呢種言論都百癡嘅。第一、係台灣，想做都無得你做。第二、佢呢個推論，會唔會太誇張呢？就憑一張咁嘅卡，就會令到人想做 AV 女優？你會唔會諗撚多咗？你係咪飲鉛水飲上腦。丫，唔好意思，台灣無鉛水。我應該問：你係咪睇 AV 睇上腦？

再講，如果家長真係當正波多野結衣係 AV 女優的話，我覺得唔單止唔會教壞細路，更可以傳達正面信息：一、職業無分貴賤；二、即使係 AV 女優，呢種貌似唔好嘅職業，其實喺外界對佢哋嘅錯誤印象。例如波多野結衣，其實係好有善心嘅。你甚至可以順便教埋佢，買野要買正版，尊重智識產權。

同一件事，係你班仆街心邪、弱智、惡毒嘅家長面前，講到人哋波多野結衣好撚似江洋大盜咁。如果你思想正面啲，你絕對可以借住波多野結衣呢張卡，傳送正面、正確嘅思想畀你嘅小朋友。

後記：波多野結衣話要向台灣「報恩」，恐怕係真心嘅。AV女優喺日本，係個好古怪嘅行業。佢哋好受尊重，同時又好唔受尊重。唔受尊重，係因為佢哋息影之後，那怕你再受歡迎、知名度再高，基本上無可能做一個普通嘅名星。而波多野結衣，因為喺台灣異常受歡迎，佢可能可以以另一個形象，喺台灣重生。做一個人見人愛，風風光光嘅大明星。我相信，呢樣野，係每一個藝人嘅目標，甚至夢想。呢件事，喺日本，接近無可能辦到。所以佢話「報恩」，未必唔係真。

以上言論，全部係我個人意見，要批要評，無任歡迎。

（中天新聞截圖）