我份人不嬲好支持非連鎖嘅小食店。喺領匯已經發展到無孔不入嘅年代，小生意要存活已經係難上加難。我成日都認為除咗五毛之外，領匯就係發展同繁殖得最快嘅嘢。尋日，我同幾個朋友一齊去某間小餐廳食飯。可惜，我又再一次中伏，啲嘢食好難食。咁食完離開間舖之後，我就同朋友吹水講返啱啱餐飯。

我：「屌，啱啱餐飯勁難食。都唔知點解咁嘅質素都仲咁多人來食？我返去寫篇食評鬧返呢間餐廳先。」

朋友甲：「你有你嘅口味，人哋有人哋嘅口味，點解你要出食評去鬧人哋呢？你既然唔鐘意食，唔好再來食咪得。點解一定要人哋煮到啱你口味先得，你咁做同共產黨有咩分別。」

一聽到我真係嚇呆咗，我即刻就想將成段說話原封不動咁回應返佢：「我有我嘅睇法，你有你嘅睇法。你唔鐘意睇我鬧佢咪唔好睇。點解一定要我讚佢先得，你咁做同共產黨有咩分別。」

當然啦，我無講到出口。但我無講唔係因為我怕或者覺得唔好意思，而係佢將差唔多嘅說話不停重覆足足講咗五分鐘有多。喺期間我不停祈禱另外兩位朋友可以飾演謝志峰嘅角色斬斷佢嘅發言，可惜佢哋選擇繼續做劉江華。

當佢終於講完，我正打算插咀嘅時候，就有另一位朋友乙發聲啦。

「咪係，你做過啲咩可以咁話人。你識煮嘢食咩? 你開過餐廳咩？你咩都無你憑咩話人哋先。好啦，如果萬一佢又執笠咗點算，咪只係益啲大財團。你而家好想啲大財團繼續發展落去咩？」

之後佢同甲繼續無限擴張，傾得興高采烈。我就同另一位朋友丙交換咗個眼神，然後無奈苦笑。喺嗰一瞬間，我覺得我同朋友丙嘅友好度上升咗百分之三十五點八。之後，我都無再插入甲同乙之間嘅話題。我當時心入面剩係諗緊一本好暢銷嘅書。書名我就唔係確實記得，但大約意思就係「有一種粗口，叫屌你」。

資格論一向都係我最反感嘅論調。因為如果一定要做過先可以畀意見或者批評，咁最底層嘅人就永遠無發聲嘅機會。而且一旦同樣嘅諗法繼續推論落去，後果會好嚴重。你係藍帶畢業咩？唔係你有咩資格話我。你係食神大賽拎過獎咩？你有開過大型連鎖食店咩？慢慢咁，你就會發現有資格講嘢就剩返第一嗰個，咁唔係獨裁叫咩？咁做其實即係根據背景將人劃分咗做唔同嘅話語階級，你唔係我嗰級就無資格質疑我。好心啦，咁鐘意分級傾計你去玩七級豬算數啦。現實生活係唔應該咁樣拒人於門外架。最可怕嘅係其實呢種論調係會偷偷地咁轉移咗話題。明明我係話間嘢做得差，你唔認同我咪應該講返間嘢嘅優點。你可以話：「其實文火煮食可以入味啲，雖然煮得耐會破壞口感，但都叫有特色。」偏偏你唔係就住餐廳嘅食物質素來反駁我，而係轉為攻擊我嘅背景。唔通我連我係末落咗嘅巴比倫帝國嘅落難王子路易斯加納凡利奧尼赫西亞八十六世都要同你講埋咩？

每個食客都有自己嘅口味同角度，唔鐘意就批評好正常。偏偏有好多人鐘意站係道德高地，連鬧幾句都唔比，去到聖人先有資格食飯咁。你一出聲鬧就即刻過來鬧你，但又唔發現佢所討厭嘅同佢做緊嘅有咩分別。呢種雙重標準，真係令人無所適從。

（圖片來源：Canadian Pacific via Flickr）