有位疑似港媽上香討訴苦， 因為「人哋話好」，所以送佢個仔去讀普教中小學，而佢自己平時都係用普通話或英文同個仔溝通，想個仔「叻啲」。有一日佢個仔因為用「西紅柿」嚟稱呼蕃茄，俾另一位小朋友笑佢「大陸仔」，咁個阿媽就好耿耿於懷，又轉返用廣東話同個仔講嘢，先發現個仔好多廣東話都唔識，「好驚佢第時大個咗俾人笑大陸仔」。

其實呢啲老母嘅心理，我真係唔明白。一開始送個仔去普教中學校、又故意同個仔用普通話溝通，無非都係想將個仔培育成操一口流利普通話嘅所謂「叻仔」咋嘛。你唔會做咁多功夫反而希望個仔普通話好屎㗎？到人哋以為佢個仔大陸落嚟，咁咪得償所願、正中下懷囉？個阿媽應該開香檳先係。就好似如果教個仔講英文，教到佢講英文嘞嘞聲，人哋問：「咦，你個仔係咪外國大，回流返嚟香港㗎？」咁先顯得個老母勁，個仔嘅口語能力好到可以同 native speaker 匹敵，去見工佢唔講人哋都唔知原來佢係土炮香港仔，咁先（好似）可以同啲 NDS（內地生）或者海歸（海外歸來）爭一日之長短㗎嘛。搞咁多嘢，又呢又路，都係想咁咋嘛，係咪先？

但神奇地，人哋講一句咋，個疑似港媽嘅意志忽然又動搖囉喎，又改返同個仔講粵語──喂呀，其實佢係咪攞個仔嚟教飛㗎，一時一樣。養隻「他媽哥池」（TAMAGOTCHI，九十年代嘅虛擬寵物遊戲）就話可以是旦養，養Q死咗就重新養過，但嗰個係人嚟㗎。人哋話普通話好，就同個仔講普通話，轉頭人哋講一句，又走去講廣東話， 再轉頭人哋話法文德文好，歐洲通行，咁又送個仔去學法文德文兼學埋法文德文同個仔溝通，五時花六時變，咪盞搵著個仔嚟搞。

講開又講，畀細路學普通話、摒棄粵語，係唔係真係咁著數呢？上面有八億幾人講普通話，唔好忘記，就算可以將個仔嘅普通話教到正宗「大陸仔」咁樣樣，都唔會學到人哋啲文化。兩地有「文化差異」，人哋直情喺上面大，如果人哋要請人返大陸做嘢、傾生意，點解唔搵個知情識趣嘅呢？香港幼稚園請教師，人哋而家直情請「普通話是母語」嘅人，有大陸人揀都仲係唔多會考慮呢個香港老母嘅仔。好嘞，你話「咁如果間公司指定要搵個香港出世嘅人上大陸做嘢，我個仔咪可以 fight 低其他香港仔囉！」，無錯，但係如果呢份「指定要香港人」嘅工除咗普通話仲要識埋粵語，因為要上廣州做嘢呢？疑似港媽個仔「好多廣東話都唔識」，咁咪又係 fail 囉。擺咁多「如果」、「假設」做前提，你可以將個結果縮細到全世界得你個仔一個人有資格做份工㖭。但事實上「好多廣東話都唔識」，喺香港搵工都有阻滯，講究普通話嘅又優先請咗大陸人先，就算最後有人肯請佢個仔，分分鐘佢又嫌份工 cheap 喇到時。普通話唔係完全唔可以學，但係學到唔識廣東話，隨時淪落到兩面都不是人嘅田地。

生仔唔係養「他媽哥池」，唔該唔好搵個人仔嚟教飛，自己分析下先。佢可以唔同意我嘅見解，但唔好人哋話好，就乜都唔諗死跟死跟，轉頭人哋講一句，又驚呢樣嗰樣又悔不當初。

（圖片來源：Wikipedia）