我今日真係好火。

臨放工開會俾老細串我話無帶腦番工，搭車諗住輕鬆下啦——
點不知一上車就聽到有兩個好似黃之鋒咁大嘅死仔高談闊論：又話施政報告「用詞錯漏百出」、又話講咗等於無講……

我睇到真係火都嚟：咁叻你嚟做特首吖！

雖然份施政報告我一粒字都無睇過，但有位朋友在facebook share咗一段「CY寄語港人『年青人要闖！』」 我就認真認同。

其實佢講嘅故事真係好勵志：
話說有位年青人讀完碩士就自覺無錢途，毅然按咗層樓就北上闖廣西，又幸得親戚朋友相助，就發咗圍有成億生意了。
我聽完頓覺曙光：啱啱上咗車，依家等緊我係機會。

比起果尐成日嘈生晒嘅廢青…… 郁啲就話辭職攞綜緩—你夠膽咩?

你敢劈炮唔撈我除晒衫倒立扮埋狗吠又點話吖﹗

迫咗成粒鐘地鐵，轉咗四轉車，終於返到屋企。
今日難得早咗放工唔駛開「賣TV」重播，梗係即開電視睇現場直播黃金時段劇集啦。
好多同事插套「舌尖上的祠堂」，古裝得嚟唔古裝、又話劇情唔合理、橋段格硬嚟，我都懶得理佢地。

咁醒又唔見佢地去做編劇。

電視劇係咁啦：唔通跟番晒現實嚟做咩﹗比啲觀眾有啲輕鬆劇集笑吓hae吓都唔得！
返工又係咁，放工睇套劇又係咁，係都要人用腦！

我就最鍾意劇入面個荒唐鏡。KK今次飾演依個荒唐鏡就最荒唐。你話劇情亂堆亂砌，搵李家鼎「頂包」肥仔麥包荒唐?

喂，現實就係咁荒唐架啦，你啲香港人又要鬧又要受，怪得邊個先。