身為一個食客，唔多唔少點都會有幾間偏愛嘅餐廳。前晚，我就諗住去其中一間自己好鐘意嘅餐廳──甲記餐廳。點知一去到門口，就發現嗰晚竟然大排長龍。我心中不禁一陣納悶，但又唔想等，唯有搭車去另一間食同樣菜式嘅乙記餐廳食飯啦。

一去到乙記，就發現今日比平時仲少客。見老闆又比較得閒，就叫咗老闆一齊坐低飲杯嘢傾吓計。

我：「嘩，啱啱經過甲記門口，唔知發咩神經鬼死咁多人。」

老闆：「鬼咩，早一兩日有名人公開講起甲記。啲人咪一窩蜂咁衝哂去食囉。」

我：「原來係咁。不過都係件好事呀，最少多咗人知道你哋呢啲本土餐廳，之後嘅生意應該會好啲。」

老闆：「你諗多咗啦。啲人去唔係真心關心本土食肆，好多都係本住一份打卡嘅心態去。好似去完就可以同朋友炫耀，一道食物三張相，仲邊得閒理食物質素。」

我：「唔係咁講嘅，多人關心始終都係好事來。」

老闆：「一年都唔知有無一次嘅關心有咩用。而且講嘅人就多，真係親自去食嘅會有幾多個啫。大部份人都係 Facebook 畀吓 Like 或者 Share ，最多換埋 Profile pic 就當做支持咗。你話啦，咁樣幫到我哋啲咩，對連鎖餐廳又有咩威脅先? 」

也許，老闆真係講得無錯。香港有好多人都係咁。Ice bucket challenge 吸引到好多人玩埋一份，但有幾多個係會持續關心慈善組織呢？蔣志光嘅金曲感動咗好多人，但有幾多個係真心留意本土音樂呢？平時就亳不關心，喺熱潮來到嘅時候先人做我做，咁同偽善有咩分別？一句「我們都係XXX」講緊嘅係唔係單單係指一個組織或者一件事，定係想講緊對一整個族群嘅關心呢？點解咁多口號會俾人搞到愈來愈爛，咪就係正正因為嗰種講完就算嘅心態。我唔係要求每個人都要瞓身支持，但擴闊少少自己嘅圈子，多留意一吓都唔係咁難啫。唔睇吓無國界醫生做咩，都睇吓 ALS 點用咁大筆錢啦。唔鐘意大台圍內人分豬肉，都可以聽吓 My Little Airport 同Supper Moment 等等嘅本地樂團啦。如果有啲野四個月前你就全心投入，四個月後你就當過眼雲煙，完全理都唔理，又點會改變到現況呢？

我：「唔好咁灰啦，老闆。或者可能真係有人試完之後就真心愛上咗，之後變為熟客呢。」

老闆：「潮漲潮退只會整濕咗啲沙，又點會真係令到海岸線上升呢？今日佢哋因為呢個潮流而來，他日都只會跟隨下個潮流而去。甲記老闆都明白呢個道理。當第一日見到佢嗰邊大排長龍，我呢度都仲係得小貓三四隻，我同佢就深知今次紅嘅只係一個名，唔係菜式。」

潮流係一件好恐怖嘅事。因為好多人都會人做我做，完全唔理會背後嘅原因同信念。亦因為咁，每次潮流一過，好多人就好似發完一場京華春夢咁，完全唔記得自己做過咩事。四個月，話長唔長，話短唔短。但我估唔到有部份醒咗嘅人可以咁快回復沉睡嘅狀態，可以繼續盡情玩樂，輕鬆過日。

聽完老闆呢一番說話，我好想叫佢走，唔好繼續做落去。但我最後都無講到出口。一來係因為我知道佢其實好鐘意間餐廳，唔會忍心放棄佢嘅手藝。二來我覺得兩個男人之間咁講好 gay。我知道自己可以做到嘅，就只有繼續支持落去。其實有好多嘢只要有1%人肯去做，都可以好有效好成功。可惜，世上總有太多的99，太少的1。

（圖片來源：明衡國際評論網）