身為一個食客，我對一個大廚嘅評價主要針對食物質素。但係料理仲未上檯之前，總係有人會率先向大廚們頒獎，邊個刀功第一，邊個最有創意。我對依種做法好不以為然，始終。其中一組未上菜先領獎嘅廚師就係人稱三廚嘅組合。

三廚又名尖中三子，曾經發明文火尖中而聲名大噪。文火尖中係指特別挑選雞翼尖同雞中翼出來，搽上腌汁同蜜糖，再用文火慢慢燒，主張用香味喚醒人心嘅一道佳餚。依樣菜式初初推出嘅時候大受好評，引來各界關注。可惜嘅係，文火尖中依道美食遲遲未能正式推出。本來抱有期望嘅食客都慢慢開始灰心，部份人更認為係有生之年都無可能一嚐依道菜式。

正當文火尖中仲係懷胎緊果陣，另一間由學生組成嘅餐廳開始推出乳鴿，深受大眾熱捧。三廚見乳鴿聲勢浩大，就同學生餐廳一齊聯手，想推出文火乳鴿。有部份食客見到之後十分反感。「學生烤乳鴿，教授燒尖中。」本身就係一個最為理想嘅配搭，依家少左一味菜式，食客嘅不滿可謂預期之中。就連一向不問世事嘅港豬都睇唔過眼，大唱「點可以由隻雞變做鴿鴿鴿~~~」來表達不滿。不過即使有食客表示不滿，但學生餐廳既然選擇招納左三廚，食客們都只有對佢地表示接受。

慢慢咁再過多一排，乳鴿嘅成效不如預期。有唔少食客已經餓到胃都扁都未有得食，就紛紛要求轉用武火將溫度升級，等佢地唔駛繼續係度鳩等。畢竟食客們都苦等多時，轉用武火加快進度都唔係唔合理。之但係，三廚就只係不停係度繼續宣傳文火嘅好處，咩環保呀，咩肉會更淋更入味，完全忽略左食客們肚餓嘅心情。一日未有野食，食客嘅不滿只會慢慢累積。多位大廚為左可以作下一步嘅行動，決定發起公投，等食客來決定應唔應該繼續煮落去。殊不知，公投竟然引起更大嘅不滿。食客們不停鬧大廚們浪費時間，認為如果唔係有心想食嘅就一早走左啦，留得係度就係想食野。後來，三廚同其他主廚都放棄左公投，食客嘅怨氣終於稍為平息。

事情慢慢去到尾聲，正當食客們以為差唔多有得食嘅時候，三廚下一步嘅行動實在令人意想不到。三廚突然表示要公開自首，要還死去嘅鴿一個交代。依個行為簡直係令我百思不得其解，我從來都未見到有間餐廳係未上菜，大廚就閃人先。即使佢地係對得住死左去嘅鴿，但又對唔對得住等左佢地咁耐嘅食客呢? 一如以往，三廚同多位大廚都係繼續忽略餐廳入面食客嘅諗法。佢地一心只係諗住點同餐廳外嘅各種組職打交道，點爭取到更多食客光顧。不過三廚都從未上菜，又點還交代呢? 三廚嘅自首就以失敗告一段落。

係自首失敗後，三廚開始呼籲食客們離開，仲話係等待嘅依段時間大家都學左唔少烹調嘅方法。主張大家番屋企遍地開花，煮比身邊嘅人食。去到依個時候，有部份人已經去到十分不滿嘅地步。佢地當初諗住來食野，最後竟然係上完堂叫佢地番屋企自己煮。就連我都要大鬧一句，屌你食譜! 呀，唔係，應該係燒你老母先啱! 屌，又講錯。總之就屌你啦。邊度有餐廳係上菜係上食譜而唔係上食物嫁? 點知我果日行行下街，原來真係有人係派食譜而唔煮野食，果下我真係想行前上去問佢做乜春。

至此之後，三煮就開始回歸幕后，乳鴿嘅大廚就繼續交番比學生擔任。三廚雖然最後都未能上到任何一道菜，尖中計劃就更加係消失風雨中，但佢地亦的確為成件事作出過貢獻。所以如果真係問我三廚應該領咩獎嘅話，Cooking Mama 最佳大廚佢地都算係當之無愧。