佔中三子之一陳健民於接受《明報》訪問時，批評「五區公投會打亂佔中步伐」，鼓吹辭職公投的學民思潮召集人黃之鋒，今晚接受本台節目《熱血政治》時爆料，指與戴耀廷對話期間，得悉陳健民的言論純屬個人立場，居然並不代表「佔領中環」！

黃之鋒在受訪時透露，近期一直與佔中三子之一的戴耀廷保持對話，對於陳健民突如其來發表個人言論感到費解：「我估唔少市民睇完呢篇文都覺得，學民思潮都佔中係咪冇溝通呢？但係好諷刺係喺呢篇文出之前兩日，我哋先至同戴耀廷，就住五區公投同電子公投，係有一個會面時間，當時大家都承認有一個空窗期，但係兩日前戴耀廷係冇講陳健民今日講嘅說話，咁我今日都私下去聯絡番戴耀廷，咁佢就話只係陳健民個人立場，並不代表佔中。」

由於政府會將政改表決時間由今年七月延至明年三月，故「佔領中環」在今年七月至年尾並無實質行動，出現空窗期，故黃之鋒表示戴耀廷承認這個空窗期是有必要解決，而學民思潮建議的辭職公投時間可能於今年八月或九月，而電子公投則於六月推行，故不會與佔中任何活動重疊。不過黃之鋒在上月九日接受《熱血政治》訪問時，就曾講到「兩個司令部」的問題，他認為民主運動不應該交給三個中年人決定點走，亦即認為可以「各有各搞」。

《熱血政治》主持黃洋達就追問黃之鋒，是否覺得陳健民的言論是否針對學民思潮：「佢提到佔領中環之所以得到支持，係因為佢哋嘅溫和主張，並不是因為激進，咁佢呢個咁嘅wording，係直指依家所謂嘅五區公投，又或者你哋嘅立場其實係等同激進，你又有冇回應？」

黃之鋒回應：「我諗陳健民擔心係五區公投令相對溫和嘅民主派未必會接受，但我哋之前同咁多政黨團體會面，老老實實，最有誠意嘅其中一個party係民協。佢哋話即使未能夠喺第一次會面去決定派唔派人辭職參選，但係如果有辭職公投發生嘅時候，佢哋係必定會助選。況且辭職公投呢樣嘢，何俊仁自己都有提出過，所以睇唔出辭職公投係拎唔到溫和民主派支持，最多係策略上會唔同。最後，如果陳健民擔心辭職公投得唔到溫和民主派支持，咁我都唔見得一個公民抗命嘅行動，係可以攞到邊緣及保守民主派支持。」

黃洋達則追問到學民思潮與民主黨的會面進展：「你頭先講到民協都支持喇，唔使佢辭職，佢梗係支持啦，咁究竟民主黨有冇表過態？」黃之鋒則回應：「民主黨到依家仲未同我哋表態，不過喺下個禮拜，我哋有機會同何俊仁及唔同嘅中委會面。」

黃洋達：「所謂各黨各派基本上都認同公民提名係不可或缺，唯一喺呢個議題上搖擺，除咗湯家驊之外，就只有民主黨，你會唔會覺得陳健民係顧慮民主黨，所以講話辭職公投做唔到佔中目的。」

黃之鋒：「頭先講到時間衝突嘅問題呢，我今日問番戴耀廷，戴耀廷話佢星期一見完學民思潮之後，就了解到時間冇衝突，但係佢就冇通知陳健民，所以陳健民要去到今晚佔中開會，先知道有件咁嘅事，所以就有尐誤會。」

黃洋達：「你哋去推動五區公投，攞緊公民提名必不可少嘅原則，係喺呢一點上面同民主黨嘅政治立場有排斥，你會唔會認為呢一樣嘢係你哋同陳健民之間最大嘅分歧？」

黃之鋒：「我又唔覺得呢個係同陳健民之間嘅最大分歧，我有一樣嘢係更加擔心，陳健民話辭職公投就唔會有電子公投，但係呢樣嘢D-day又未商討過，亦未見過佔中秘書處會講，咁其實佢咁樣講，有冇問過佔中參與D-day嘅朋友呢，呢一點我覺得好重要。」

黃之鋒重申，他們沒有意思排斥任何政黨，即使民主黨仍然強調公民提名並非必要原則，又或者日後反對五區公投也好，仍然歡迎各派別將提議公開討論，但他相信「佔領中環」中，公民提名已經成為共識。

除政改以外，近期「普教中」及貶低廣東話亦成為了熱門話題，不過黃之鋒就認為學民思潮需要就事件開會討論，暫時未有共識。他表示，學民思潮雖然關心教學議題，但就不想「表完態就收工」，亦不想每個議題都要插手，未來有任何消息會即刻公布，現階段最關心的議題仍是政改。