今日尖沙咀海運碼頭發生「佔領郵輪」行動，事緣美麗華旅遊的一個郵輪團，本月1號於香港出發，前往海南島三亞、越南峴港及下龍灣，當去到主打景點下龍灣時，因為航道出現問題未能泊岸，於海上漂浮兩日後，於今早6時折返本港，一眾旅客因不滿安排，拒絕上岸，留守郵輪抗爭。乘客之一的立法會議員蔣麗芸，今晚接受本台節目《熱血政治》主持黃洋達訪問，暢談抗爭初體驗。

蔣麗芸表示，現階段尚有300多名乘客參與「佔領郵輪」行動，不肯落船。黃洋達問到她是否今次行動的主腦：「你依家帶領緊個佔領郵輪運動喎！」蔣麗芸則作出否認，指她只是受乘客邀請出來為群眾出頭：「咁又唔係，其實係乘客自發嘅，我諗住落船，但係俾佢哋摷到我出嚟。」

有別於其他團友，蔣麗芸只是以自由行身份登船，主要想去下龍灣觀光，無奈卻變成「少女麗芸奇幻飄流」。她於訪問中透露未能泊岸的3個可能：「佢話個航道有問題，具體原因講話可能沉船，有傳聞話旅行社倒閉，亦有人話接待能力不足。」

蔣麗芸透露，今次「佔領郵輪」行動的3個訴求，首先是要查出未能泊岸原因，其次是要求美麗華旅遊道歉，最後是要求作出三分一團費賠償。乘客已經與美麗華負責人展開談判，在未得到回應前堅拒離開。

黃洋達問到：「佢依家係一個佔領行動，你支唔支持呢個做法？」蔣麗芸表示受到乘客的感染而改變想法：「其實最早嗰陣我勸佢哋唔好，我哋以法律返去同佢哋傾啦，但係佢哋亦都有佢哋嘅point囉，佢哋認為一定要留低喺度，船就開唔到喇，旅行社先至會理旅客，我都希望從旁可以協助。」

黃洋達：「呢個直頭係公民抗命嘅行動嚟喎，即係同佔領中環係一樣。」蔣麗芸：「又唔係話公民抗命嘅，應該係叫做商業同消費者之爭。但係旅行社都應該要回應佢哋嘅訴求。」

被問及是否首次參與示威行動，蔣麗芸就傻笑回應：「我好少呀，而係我覺得咁啱同呢一班旅客，坐埋喺一條船上，咪睇吓有乜嘢可以幫到手，我亦冇理由要旅客聽我話，假如佢哋認為要做嘅事，我亦都冇權反對，我可以提出我嘅意見。」

黃洋達：「你依家成個印象，就好似帶領緊一個小型嘅佔領行動咁，你係咪扮演咁嘅角色呢？」蔣麗芸再一次傻笑回應：「我又冇諗太多喎，我遲尐分析吓係咪咁樣啦，值得研究吓，再研究，再研究。」

事實上，蔣麗芸亦透露她已經準備落船，並指司機等了她一日，但眼見其他人不願離去，才決定與其他乘客一齊留守，待糾紛解決後才離開。黃洋達再問到：「美麗華唔回應，好似梁振英政府咁，咁點搞呀？」蔣麗芸即連忙解畫：「兩件事，有時你睇吓個訴求係咩，今次美麗華真係錯嘛。」

蔣麗芸指美麗華方面並沒有大錯，但明白乘客付出高昂旅費，因此希望旅行社不要「賺到盡」，並承諾日後與企業界「講多尐」，關心普羅市民的感受，減少大家怨氣。


節目重溫：
《熱血政治》第41集：大公報念念不忘癲狗/訪問馮檢基/蔣麗芸抗爭初體驗
http://www.passiontimes.hk/?view=prog83&ep=41