「天口凍，著多件衫！*^_^*」Vivien 的 whatsapp 彈出這句訊息。她看了一眼，就把訊息關掉。

分手已三個月了，是 John 提出的，說現階段想專心事業。之後，John 不時會 whatsapp 給 Vivien。其實 Vivien 也覺得無謂，所以從來都沒有回覆他，但 John 照樣每隔十天八天便發一兩個短訊給她，有時說天氣，有時說哪部電視劇很好笑，有時說自己正在哪間餐廳排隊，有時說某明星來香港開演唱會，總之都是些很瑣碎的事情。

那天晚上 Vivien 跟兩位好姊妹飯聚的時候，酒酣耳熱，就談起自己和 John 的情況。

「你對佢嚟講，只係叫做好過無，用英文表達即係 Nice to have，但你對佢絕對唔重要。」Sally 淡然說道。

「首先一個男人會同你講分手，佢就一定係唔愛你，唔使再呃自己話佢有苦衷。男人對自己想要嘅嘢，會努力去追求，並唔會用任何藉口去放棄，尤其是咩專心事業果尐濕鳩理由，收啦。佢連唔再愛你都唔肯直接承認，呢種男人差到極點。」

「點解差到極點？佢唔係驚講得太過直接會傷害到我咩？」

「傻婆，如果佢驚傷害你，就唔會分咗手都繼續做埋晒呢尐小動作。當男人唔愛一個女人嘅時候，佢心知肚明，最好嘅處理方式就係分得清清楚楚，唔好死唔斷氣，咁樣先可以將傷害減到最輕。話咗分手仲時不時走嚟撩你，仲要你唔應佢都繼續撩，即係佢覺得你仲有尐咁多價值，但又確實唔係咁鍾意，唔可以做女朋友。你喺佢心目中同贈品差不多，唔會討厭而且有時拎嚟打發吓時間又唔拘，所以手痕果時咪嚟撩下你囉。」

「呢個世界有好多人都係抱住 Nice to have 嘅心態去對待一尐佢唔係太鍾意嘅異性。你記唔記得 Anthony？我個同事呢，你上次見過嗰個。佢女友同佢提出分手之後，堅持要繼續做朋友。隨後呢位女士時不時 text 佢傾閒計，甚至約出嚟食吓飯，即使個女人已經識咗新男友都係咁。Anthony 梗係仲鍾意佢啦，結果喺所謂『分手亦是朋友』嘅呢幾年，Anthony 一直都無辦法放低佢。」

「仲有我個妹呢個傻女呀，佢鍾意個同學好耐，亦都打探過個男仔係單身。兩個人都好似幾曖昧咁㗎，但係往往一進展到關鍵時刻，個男嘅就會冷淡落嚟，搞到阿妹患得患失，成日都唔知點好。直到有一日，個男仔約佢出街，show 電話張相佢睇，話相入面個女仔啱啱應承咗做佢女朋友。阿妹返屋企喊到豬頭咁，我先知道呢件事咋嘛。」

「你，Anthony，我妹，喺呢尐人眼中都只係叫做『有好過無』。如果唔係嘅話，你唔睬阿 John 咁多日，佢一早打嚟搵你啦，係咪。」

吃過飯，Vivien 跟姊妹道別後，獨自坐上巴士。她看了一會風景，最後掏出手機打開 whatsapp，把 John 封鎖了。

（後記：情人節將近，特意寫寫愛情應應節。熱戀中的情侶當然開開心心，真心相愛的，無論是預訂五星級酒店吃大餐，還是手拖手去譚仔吃酸辣米線，依然如痴如醉。但總有無數可憐人，隨着情人節逐日逼近，心情卻越是忐忑──到底他／她會否約我？到底他／她的心意如何？小妹僅希望各位可以鼓起勇氣，不再當 Vivien／Anthony。當你拒絕再做某人的 Nice to have，重新把眼光放遠一點，才可以看清誰會把你當成他／她的 Must have。）



（圖片來源：WhatsApp）