做page要多料多嘢眼，你自己動手做得幾多，於是人人網上食網上屙，到處偷圖截文，copy咗落黎就當自己嘅，一旦被發現，一句「so99y囉，落番你條link囉」就算數，其實幾著數。你以為咁已經寸到世界盡頭？傻豬，宇宙係好大嘅，你小小人類嘅目光又點見到盡頭丫。

就早兩日，BeautyExchange的Facebook Page偷了博客Chocolate Muimui的一張抹茶流心蛋糕圖當作自己的去farm likes，受害人見了，自然留言投訴。不料，BeautyExchange竟然Block了受害人，讓fans看不見受害人的投訴，當作没事發生，繼續用，面皮之厚，底氣之足，堪稱巴閉。

一眾網友看不過眼，紛紛上該Page留言反映，BeautyExchange一貫驕橫的作風，逐一block了對其偷圖有異議的網友。此舉一激，各網友糾眾到處留言和share遍地開花，BeautyExchange才刪了圖，然後當没事發生一樣，照樣風花雪月，好大的官威。

筆者乃好事之徒之一，被block後收到大官的留言回覆（大概他們不知道我竟得知自己被block了吧），用英文的（見上圖），大意是：「剛剛同當事人so99y咗啦，我地會諗法子阻止同類事情再發生啦，希望你明白啦。」完全没有公開的回覆和道歉（我是被block之人，回應我的英文回覆其他會員無法看見）一個無端被block的人，其實没什麼正面的事可以明白的。不過過兩日，我總算明白了一件事，就是他們所說的，「諗法子」，就是在偷來的圖加上「圖片來源：互聯網」的字樣，可謂皇恩浩蕩，不如你寫地球、宇宙、十方眾生啦。

第一錯：網上事網上了，你做網，就不要到處得罪網民，像那種大公司，平日聽freelancer或是vendor鬧唔少，以大欺小，唔找數，要你加呢樣做多果樣，就係烚你「奈得我何」？找律師告我啊笨？睇死你無錢請律師啦。BeautyExchange對著投訴人Chocolate Muimui，明放著就是當他像一般vendor一樣，予取予攜，任由欺壓，你敢投訴？block咗你，我理得你。

網民没有找律師之理，只好網上申訴，一傳十，十傳百，同仇敵愾，也不是好玩的，拖不垮你，足以讓你麻煩。你做網，何苦得罪米飯班主？給人多一點尊重，大公司難道就是不能學會？問一句，或至少加條link，到底蝕底咗你啲乜？

第二錯：你網用中文，你明明識中文，我給你的留言用中文，你幹麼用英文覆我？公關好基本常識，人家用中文說你用中文回，人家用英文說你用英文回，以示溝通誠意。中文質問英文回，當事人假設的情況只是兩種，一：罐頭回應，一式一樣照copy比你，亦懶得為你翻譯；二：顯示高高在上，我用英文文明人呀，你識唔識雞腸呀，知驚未？我唔知邊一款在公關層次來說比較好。

可惜筆者就是個粗人，盲字唔識多隻，自然對號入座第二款，終日自慚形穢，幾乎要危坐天台。不過講真，你英文可以再學好啲先，咁我就唔止危坐，跳埋落去，做多步，效果好好多架。

公關最終奧義，錯到世界盡頭，證據確鑿，兜無可兜，其實道歉是唯一出路，道歉道得好，往往還加分（請參照官恩娜的道歉），這就是公關值錢之處。不過大公司，又耳濡目染了香港最高領導面對錯到世界盡頭、證據確鑿的回應手法，應該，唔會肯做架喇。公關？你睇睇香港最大嗰幾個？食屎架喇。

（本文原載於作者博客，蒙作者答允轉載。）