英國駐香港及澳門總領事今日（2月16日）在其 youtube 頻道，上載了駐港澳總領事吳若蘭的2015年新春賀辭，吳若蘭已經是連續3年於農曆新年前夕，以廣東話讀出新春賀辭，而今次的片長有3分06秒，亦是3次之中最長。

吳若蘭在賀辭中，特別談到普選問題，她指政改爭拗為港人帶來煩惱，但就對2017、2020以及往後的普選進程，抱審慎樂觀態度。她又指羊年是一個轉捩點，除了5月英國會舉行大選之外，香港亦有區議會選舉，她指今年香港和英國將會有更多的交流。

在最後階段，吳若蘭更表演用揚琴彈出廣東新春樂曲「步步高」。

英總領事賀辭全文：

大家好！ 我同英國駐香港及澳門總領事館仝人，喺度祝大家農曆新年快樂！

今年，係我喺香港過嘅第三個農曆新年。喺過去一年，我哋馬不停蹄，工作得非常之充實。自從英國財政大臣歐思邦舊年二月訪港之後，我哋喺香港同澳門，不論係政治、商務同領事服務方面，都快馬加鞭，全力以赴，同時亦跨過咗唔少嘅困難。

我熱切期待羊年嘅來臨。羊，係一種溫柔、平靜、有耐性，兼富愛心嘅動物。我相信，呢啲特質，喺2015年會同樣體現喺香港人身上。

無可否認，有關政改嘅爭拗，喺羊年會為香港人帶嚟一啲煩惱；但係，我哋對2017、2020以及往後嘅普選進程，仍然抱住審慎樂觀嘅態度。

對好多人嚟講，羊年係一個轉捩點，嚟緊五月英國會舉行大選，香港都會舉行區議會選舉。
今年，我希望英國同香港會有更緊密嘅聯繫，無論係雙邊、文化、教育同商貿各個範疇，都有更多嘅交流。

喺2015年，我同我嘅團隊，衷心希望繼續同香港特區政府、各界人士以及澳門各方好友通力合作。

而家，等我喺羊年用揚琴彈一首傳統嘅廣東新春樂曲「步步高」。

祝大家羊年喜氣洋洋，步步高陞，如意吉祥，恭喜發財！