窮人過情人節，當然是找免費娛樂，免費景點。大時大節，家住新界的我們，上星期日決定好豪地花幾十蚊車錢過海半天遊。晚飯後，我們想起還未去過PMQ元創坊，又想起那兒好似有個 Night Market，於是決定過去逛逛，偽文青一下。

果然兩個都太凡夫俗子，行完覺得好運吉。

情人節晚上，除了個別一兩塊小告示，佈置欠奉。無播音樂，所以氣氛欠奉，不知是否跟多個月前被居民投訴嘈有關。

無表演的 Night Market 等於跳蚤市場。有賣有機產品，有賣酒，有所謂本地設計的少量衫褲，大量飾物。即是咁，我不會質疑云云眾小檔口投放的大量心血，也不會懷疑當中可能孕育著下一個 Andy Warhol，但大時大節都無特別搞作，人流仲少過一般商場，會不會去大專學院賣物會擺檔更有效果？

上樓認真行了一圈，可能因為夜了，好多單位已關門，大時大節藝術家都要休息的，明白。不過觀看各櫥窗和觀望店內，似乎都有大都是搞工作坊，或者賣皮革品、手工藝、碗碗碟碟。未行完，隔離嗰位已經話，同石硤尾個賽馬會乜嘢創意藝術中心有何分別？做乜隔個海又整多個，專給港島人嗎？事後問真正文青友人，就話覺得PMQ走較高檔路線，哦……

有個平台連接兩座大樓，木板加有植物，好似 Resort。靚就靚，不過我就聯想到，個位叫住附近學生哥過來溫書都幾好，夠風涼水冷，又有綠色養眼。

最有看頭是 Chocolate Rain 的店，至少色彩繽紛，不過隔離嗰位覺得風格太女仔，不甚懂欣賞。

到底去PMQ除了預早安排好付錢上工作坊，有甚麼好玩？我事後周圍問人，到底是我太白痴唔識玩，還是怎樣。有友人話有免費電影看，我話周圍都唔見有牌。友人傳個連結過來，原來要 Book。後來有人話我知其實有 Speed Dating，但似乎都無得即時參加。今時今日不會 check Timable 活動資訊的冒頭烏蠅白撞客如我倆，完全變成狀況以外。我想起早前關於渣圈圈的討論，排他如此的這種創意文化圈子算不算？

可能我們太庸俗，未夠班欣賞這樣的創意工業項目，但億億聲計，在上環貴地發展的項目，又話會搞社群共融， 難道不應該要求更多？至少不是應該有一種一般人也感受到的活力，有一般人可以開開眼界的東西？而不只是要行入個別單位， 才偶然找到一兩件曠世之作？

不過各花入各眼，同朋友講無嘢好玩，有個問我沒看見大型空中金色紙藝羊裝置，還有羊花燈嗎？當下無言，成億活化完，我就覺得我希望見到的比商場式節日佈置多一點囉。原來不只普選，好多事都可以袋住先。