「就係呢度啦！上次我喺呢間 TREAT 睇中咗個限量版 GUZZI 手袋，正想拎去畀錢嗰陣，有個大陸女人趁我接電話唔為意，一手搶咗去俾錢，之後我問售貨員已經無晒貨。從此我經過親呢間嘢都諗起個袋，睇到街上有人拎 GUZZI 袋又會諗起，我連嗰日打俾我個朋友都好怨恨，依家已經無乜點同佢聯絡。」Fanny 心有不甘咁同身邊嘅 Mina 講。

「你同我講過啦。」Mina答。

「係咩？咁真係好激氣嘛。」

「但係，我記得你上次同我講好似已經係好耐之前囉喎。」

「我知，件事成三年前㗎啦。個 GUZZI 係2011年限量版，我好記得。但係真係嘛，一諗到個限量版 GUZZI 曾經喺我手上，眼白白睇住佢無咗，之後買唔返，我就無辦法忘記佢，唉唉！」

Fanny 同 Mina 入到間餐廳，Fanny又繼續講：「唉，Mina，其實我最近都好煩。」

「我發現 Brian 收埋咗啲佢同ex嘅嘢喺個月餅罐度，有戲飛、迪迪尼入場券、貼紙相嗰啲，我好唔舒服，你話我好唔好開聲叫Brian掉晒佢？」

「點解要咁做呢？」Mina 笑笑口問。

「點解？你問得咁出奇嘅？我同我啲ex嘅嘢，分手嗰下已經掉晒啦，既然已經過咗去，做咩仲要留？一諗到 Brian 明明已經有我，仲要收埋呢啲嘢，可能仲時不時拎出嚟重溫舊夢，我個心就好唔舒服，覺得佢個心好似仲有ex咁。」

「咁你覺得 Brian 同佢ex之間仲有無藕斷絲連呀？問心嗰句。」

Fanny 諗咗諗，答：「咁我覺得又應該無嘅……而且佢個人仲好識分寸，會自己同啲女仔保持距離，我覺得佢好好㗎。」

「咁，如果你問我，我就覺得 Fanny 你實在太小題大造啦。」Mina 飲一啖羅宋湯，又講：「其實佢同ex有幾多回憶都好，都已經過咗去啦。Ex之所以會變ex，一係無緣，一係無份，總之一定有原因令到佢哋散咗。Brian 又唔係蠢人，往事只能回味呢家嘢，佢自己都一定好清楚。你都識講佢而家唔似同ex有藕斷絲連啦，換句話講，呢啲舊物只係一啲紀念品，用嚟記錄佢人生嘅一段時光。」

「你舊年同我去台灣旅行，夠有買天燈鎖匙扣啦。但你會唔會一睇到個天燈仔就想即刻飛去台灣放多次？好明顯唔會啦。」

「依家我見 Brian 對你咁好，食飯時有風口又驚吹親你，行得遠又驚你攰要 call 的送你，呢啲你又唔諗，硬係要同啲只可以屬於過去嘅人鬥氣？你咁做，唔講第二樣，首先已經失咗作為現任宇宙唯一正印嘅霸氣先啦。係唔係先？」

「咁……你又講得啱嘅。」Fanny 點點頭。

「仲有呀，唔講嗰句都講埋。頭先你咪提起嗰個限量版 GUZZI 袋嘅，你咁掛住個袋，係因為你曾經揸住過佢，然後又眼白白睇住佢喺你眼前消失，仲要呢世都得唔返之嘛。老老實實，如果你而家擁有個袋，你仲會唔會每次行過 TREAT 都諗起佢呀？如果你逼 Brian 丟咗個月餅罐，個罐就會成為佢失去咗嘅限量版 GUZZI 袋㗎啦。你真係好好衡量下啦。」


延伸閱讀：
【傲將軍︰男人的私密月餅罐】
http://www.passiontimes.hk/article/02-11-2014/8589


（圖片來源：kaiscapesllc@flickr）