近年紙紮舖都會製作一些貌似陽間產品的祭品，讓孝子賢孫拜祭時燒給先人享用。在台灣購物網站上，就有紙紮工藝店推出紙紮「switch」，跟機有遙控有火牛再加兩隻game，認真貼心。

有網民發現台灣拍賣網站「露天拍賣」，網店玉華香舖在2月時推出了「任天堂 switch（附遙充電器 遊戲卡2個）」，每部售價新台幣2200元（約港幣568元）。當然，後面清楚註明係送畀先人嘅「 紙紮 紙衣 紙扎 往生用品」，陽間無法使用。

跟機有盒、有充電器、遊戲卡2個、當然唔少得封條，寫名先人至收到。網店附圖所見，機身製作頗為精美，兩邊遙控照樣可以分拆，機身卡槽亦可以換帶。賣家講明紙紮品係純手工立體製作，製作需時，未知會否重現陽間曾經「一機難求」的狀況呢？


有人在網店「問與答」欄目查詢跟機game係乜，賣家好快回覆「您好，這是紙紮品，附的是馬莉歐及薩爾達，感恩」。咦？買機唔駛食骨喎。

未知遲下新出嘅紙皮配件，可否同時支援陰陽兩用呢？自己砌又得，清明燒畀先人又得，得咗。

（圖片來源：露天拍賣）