政府話，香港電視用流動電視制式播放節目，如果接收處超過5,000個，就要先取得「免費電視服務牌照」先至可以播放。明明流動電視牌照唔受《廣播條例》規管，但而家無啦啦搬龍門搬到港視都要受規管，如果法律係咁玩都得，網台都一樣要受同樣規管啦係咪？

咁得啦，《爆機兄弟》個達哥，你逢星期一至五晚九點半至十一點半都係網上進行打機卡關廣播，有聲有畫有旁述，風雨不改（好似係），觀眾閒閒地都過5,000，個台主得閒仲會拍廣告秘撈。唔該阿達哥，你都要同王維基一樣，向政府申請返個牌，先可以繼續開台。

咩話？你係網上開台關咩事？咁王維基個牌，明明上一手又係咁做，點解去到佢手就會變犯法？佢又關咩事？點解上一手做嗰陣冇人敢出聲？中移動子公司大哂？你答唔到唔緊要，因為根本個政府都答唔到。

你又可能話，政府係針對王維基啫，關我咩事？我開到台就得啦。而家可能係啱，但係萬一有一日，有個係倫敦政治學院讀緊書嘅八婆，開你個台嚟睇，嫌你又卡關把聲又畢，打個電話去同佢 Daddy 講聲，再落柯打叫下面班奴才搬龍門，通過埋網絡廿三條，達哥都要申請電視牌照就唔會再係筆者吹水戲言咁簡單，到時你哋唔好喊出黎，因為香港已經係一個咁荒謬好笑的地方，仲好笑過達哥。

（本文原載於《膠登時報》，蒙作者答允轉載。）