網民都係市民，市民都係網民，偏偏有啲主流傳媒就係都要將兩個字區分，企圖控制輿論導向。點樣控制？好簡單：做實事嘅就市民，做柒事嘅就網民；啱聽就市民，唔順眼就網民；和平就市民，激進就網民；多數人就市民，小眾就網民。

當然，有時用「網民」呢個字係會方便啲，而通常呢啲時候，「網民」係指「使用互聯網去做某某事的市民」。注意，即係話，「網民」都係「市民」，只不過係比較活躍係網上活動既市民。例如，City 女被人影咗個靚背擺上 Secret Group，引來「網民」激烈討論。因為呢啲「市民」喺呢件事上面係用緊「互聯網」去行動，咁用「網民」一詞去形容會比較適合。但係當「網民」走出網絡世界，係現實生活行動嘅時候，點解仲要用「網民」而唔用「市民」去形容呢啲生活在同一個社會環境的人？「網民反自由行」、「一批戴上紅臂章和手持毛語錄的網民」⋯⋯點解講到網民好似生活喺另一個世界咁？乜佢哋唔係香港市民一份子？係唔係換上「市民反自由行」個效果就太勁得滯？

當打工仔日日十幾個鐘對住部電腦、何俊仁都係開會時上網睇J圖、王維基都用真名上高登時⋯⋯香港人，仲邊有網民市民之分？你搵唔搵到一個香港市民係完全唔會接觸到互聯網？搵唔到，就唔好再抹黑「網民」呢個term，然後將一切罪名推畀「網民」，企圖掩蓋社會上你唔想聽到既聲音。因為，其實個個都係網民。

有啲新聞網站，總會有人留言話「唉而家啲網民淨係識嘈！好唔和諧囉。」下？Seriously？用緊電腦打呢句 comment 既人又算唔算網民？如果算，佢係咪話緊佢自己？如果唔算，佢係點樣打呢句 comment？不過嚴格來說又真係唔可以叫「網民」，叫「五毛」會貼切啲。咦，咁唔知係 Facebook 係咁出 Status 鬧人嘅黃秋生又算唔算「網民」？

實體信嘅「我愛你」或者會比 whatsapp 嘅「我愛你」更有力量，但請願信內嘅文字唔會比 Facebook 嘅留言更有代表性。唔好再用「網民」一詞來打壓我哋嘅聲音，我地都只係會上網嘅普通香港市民，僅此而已。而我地既意見，同樣應該獲得重視。

（照片由本報專欄作者翼雙飛提供）

（本欄逢星期四刊出）