有幅 cap 圖，係有港女 post 話同有錢仔出街係唔同，話又遊車河又食酒店自助餐都一蚊唔駛出，佢仲因為要揸車送佢返屋企無飲酒添，所以上咗人地屋企瞓，結果一 po 就比人鬧到飛起。



老實講，你話佢彭于晏咁款，你有 feel 咁唔緊要，我都覺得女仔有性自主權，無話 cheap 唔 cheap，但通篇無講，只提及物質層面好吸引。好，就同你講物質層面，我想說，請你食一餐酒店buffet幾錢？男仔自己有份食嗰份唔計，食到 grand hyatt 都係一千，因為一千同人上床，私鐘都唔算收得貴，你好蝕；你想佢做你長線飯票，第一次食飯同人上床點都唔係將自己 position 做女友嘅明智一步，我亦從佢提及嘅跡象唔見得個男仔會同你建立長遠關係。

咁你話你做緊咩丫？仲咁威水上網同人講？

其實如果個男仔有錢嚟講，我認真覺得係玩佢，唔好話有錢人咁識生活品味，一般人第一次約女仔其實好少食自助餐，服務唔多，行出行入又 distract 你地傾計；況且，其實自助餐唔係真係咁 fine-dining，真係有錢就帶你食 A La Carte，啲嘢先最靚最好食，亦可以比自助餐貴好多倍。

佢第一次約你就帶你食酒店自助餐我覺得有幾個可能性：

一，控制成本，因為自助餐係定價的，你點食都係呢個價錢，何況，佢酒都唔開支，就仲平。帶你去 A La Carte 點知你會點咩菜？你去貴價地方叫兩打生蠔、鵝肝、和牛、阿拉斯加蟹乜乜乜，佢唔通唔比你叫咩？咁太高風險。況且，食自助餐條女係唔會睇到餐牌亦唔知價錢，帶去食間有 promo 平價啲，佢唔知；A La Carte 條女識睇價錢，你去平少少佢都知，焗住食貴。

二，佢對你 table manner 無信心，怕你失禮佢，自助餐就無呢個問題，比較 free。

三，佢根本知你係鄉下妹，唔識嘢，食自助餐就以為好巴閉，加個酒店牌頭已經以為威到上太空（事實都係丫，唔係駛乜上網曬命），帶你去食私房菜又貴，你又唔識係乜黎，嘥料。

而我覺得，齋睇個女仔寫嗰幾段仔嘢，個思考、邏輯、眼界，個男仔嘅考慮係包括晒一、二同三的。

拜金都唔緊要，拜得精明少少囉。

（原文載於作者面書專頁 ，承蒙作者答允轉載。）

作者面書專頁：https://www.facebook.com/chelaygor/posts/958455504204640