拉錯智障男，大家都將討論焦點放在警察是否失職，而忽略咗一個事實，就係差佬明屈，老作口供紙。大家試唸下，如果錯手拉咗嗰個唔係智障人仕，而係一個正常人，唔通就可以任由班差佬亂作口供紙？

砌生豬肉，老作口供，依個明顯係妨礙司法公正，係相當嚴重嘅刑事罪行。假如事情發生喺一個常識普及的公民社會，公眾輿論的焦點必然唔係《差人有冇拉錯人》，而係嚴肅討論一下，以後係咪可以接受依種辦案手法，為咗close file，可以亂寫口供紙。

簡單來講，就係大家將來包唔包容到「砌生豬肉」依回事。案件發生咗個幾星期，已經喺社會上討論咗咁耐，發酵咗咁耐，而討論個著眼點都仲係停留喺「警察叔叔拉錯人啱唔啱」依個咁撚白痴的骨節位上，證明香港公民社會的智商水平，仍然維持喺一個偏低的水平，甚至係未脫離封建時代嗰種「老百姓應該安守本份，唔好激嬲啲衙差呀！」嗰種思維模式。

到依一刻為止，差佬都仲未對涉案嘅警員進行刑事調查，退一萬步，連最基本的道歉都未有，真係匪夷所思。我覺得，除非大家接受到「砌生豬肉」，否則依單野一定要追究到底，任由警察胡亂執法而不須負上責任，後果不堪設想。