「無煙城市」呢個口號你日日聽，唔知仲以為係全世界嘅潮流，但係到底世界各地有幾多成功例子呢？其實，全球195個國家只有不丹一個國家做到「無煙城市」，係195分之1，手術成功率大概係0.5%，即係如果你想全面禁煙，移民去喜瑪拉雅山仲實際啲。

「無煙城市」講就好聽，但說穿了只係一個美麗而唔實際嘅口號，就好似世界無煙日咁。「地球一小時」雖然都只係雷聲大雨點小，但總算有人會響應熄燈一小時，但世界無煙日你會唔會戒一日煙？如果連無煙一日都做唔到，無煙城市又從何談起？

食煙有害人人都知，但係點解依然仲咁多人食？香港政府一味靠嚇，但係單靠嚇到底係咪真係足以令到食咗幾十年煙嘅煙民去戒煙？

一時又加煙稅、又話搞室內禁煙、又嚇你陽痿爛腳，但原來吸煙人口嘅減幅不斷按年收窄。對忠實煙民黎講，靠嚇嘅作用從來都唔顯著，而香港政府又冇為佢地提供合理嘅煙草減害產品，可以話香港控煙已經走到樽頸。

但係香港政府依然係老調重彈，唔得嘅方法一直做繼續做，公帑一直浪費，然後又有藉口加大煙稅填數。

比起一手煙嘅無效禁煙措施，政府對二手煙更加係一路都掉以輕心，接近90萬非吸煙者係因為「被動吸煙」而死亡，二手煙對健康嘅害處絕對唔比一手煙低，但係政府就從來冇著手開發煙草減害產品。

市面上一路講緊可以避免二手煙嘅加熱煙，但就至今都未有正當途徑買加熱煙草，政府到底幾時先肯積極研究相關產品呢？

當人人都轉用加熱煙，加熱煙嘅電子裝置已經周街有得買嘅時候，反而政策就拍馬追唔上，想喺香港買到合法嘅加熱煙草究竟仲要等幾耐呢？