是咁的，今朝畀老闆召入房，話有嘢同我傾。我都知冇帶挈架喇，講少少背景資料先。

話說老闆個位係起我哋舊老闆飛腳搶返嚟，之後一路行高壓政策，佢話行冇人可以企，有時路過仲會拎走你杯凍奶茶嚟飲。雖然成班同事都好不滿，但 office 周圍都裝晒閉路電視，而且每個 department 都落晒針，試過有同事講佢壞話，第二日就冇再見過佢返工。聽聞呢個老闆仲有案底添。

講返正題……入到房，見到我份《僱傭合約》喺檯面。

「你今日做咩一點三先去食晏？」

「公司有『彈性午膳時間』嘛，你睇份《僱傭合約》都係咁寫。」

「Jean Paul，我同你講，公司對員工擁有全面嘅管治權，對『彈性午膳時間』有監督權。『彈性午膳時間』唔係固有，係公司授權，『彈性午膳時間』嘅限度在於公司話有幾彈，你就有幾彈，而家我有話畀你遲三個字放飯咩？」

「唔係喎老闆，《僱傭合約》白紙黑字寫明：『員工享有彈性午膳時間。』，冇你頭先講嗰啲喎。」

「你知唔知咩叫《僱傭合約》？」

「《僱傭合約》係保障僱主同員工雙方利益嘅協定，當初 HR 都係咁同我哋解釋……」

「錯，錯得離晒譜！話明係《僱傭合約》，『僱主』係聘用『傭工』嘅前提同基礎，『傭工』從屬於『僱主』，兩者唔係等量齊觀。換句話說，公司先係對員工行使管治權嘅『權力主體』。」

「咁係咪即係公司大晒？」

「乜你咁蠢？講到明都仲要問！你哋就係有啲人，對《僱傭合約》有模糊認識同片面理解先至咁多嗲，你哋只係我隻狗，做我隻狗仲竟然敢唔愛公司！唔駛講咁多，總之你遲放飯就係違反咗《僱傭合約》，公司而家正式解僱你，你即刻出去執嘢走！」

「咁你賠返代通知金同埋20日年假嘅錢畀我！」

「而家係你違反《僱傭合約》我先炒你魷魚，所以冇代通知金，至於果20日年假……」

老闆冷笑一聲，然後喺銀包潛咗張廿蚊紙出嚟：「拎去啦，係你應得嘅！」

「又點呀？我份約寫明我每年有7日『有薪年假』架！」

「份約寫嘅只係『有薪年假』，唔係『有全薪年假』，而家我話你每日年假係得一蚊，反正你冇任何剩餘權力，你吹得我漲？」

我聽完好嬲，頭也不回衝出房門。點知原來房門一直冇閂實，頭先老闆咁大聲，應該全公司都聽得好清楚。

我抬頭一望，但見同事們耷低頭默默工作，若無其事。