因為阿女要轉校做插班生，今日要到新校辦手續，中學部條隊有十幾人，而小學部條隊約二、三十人。我差不多排包尾，排喺我前面嗰3個係大陸人，喺我後面嗰兩個又係大陸人，我就好奇再留意排喺隊頭嗰幾個，又有兩個係大陸人，其他就留意唔到喇。當時心諗，死得啦！連中學插班都搞成咁。

辦完手續，去咗一間馬鞍山嘅幼稚園，處理完芭蕾舞班嘅事務之後，我就趁機問幾個畢業生嘅家長，佢哋喺小學統一派位派成點。因為馬鞍山係跨境學區之一，之前都有好多相關新聞報導過，當其時教育局就否認安排失當，吳克儉回應話設立跨境校網嗰陣，已作出多方面考慮及諮詢，認為能夠全面照顧各學童。仲話跨境學童派到去天水圍、屯門係預期之內，咁即係對其他區影響唔大啦。事實係幾個小朋友都派唔到本區小學，全部都係派十幾志願，好小小就去沙田，最大鑊嗰個要去到葵涌。咁嗰幾個家長唯有靠叩門呢個最後機會，睇見佢哋個徬徨樣，真係覺得好陰公。

其中有兩個家長，仲有多個細路喺下年畢業，咁我問佢哋點打算？唔問由自可，問完仲嬲！其他家長就各有提意咁樣，有人叫佢哋搬啦，唔係跨境學童校網可能好小小。有人仲仆街就話，喺自行派位嘅時候報假地址，博一博，好多人都係咁啦，香港人又有，大陸人又有。

聽到佢咁講，我即時反駁佢：「犯法架！」何況自行派位嘅時候，已經有好多跨境學童搶走好多學位，而且已經有好多大陸人係咁做啦，今日《東方日報》都有報，大陸有中介公司做呢啲犯法事，報名校網有，報北區又有，最重要係冇理由為咗避班大陸人而去犯法啫！而仲有細路嘅嗰兩位家長，異口同聲咁話：「唉！唯有自求多福啦！」當時要趕返公司，我冇同佢哋傾落去，只係話下次見面再傾，但係「自求多福」呢句說話，其實我唔係第一次聽到，好幾次同其他家長傾開有關政府施政、教育政策嘅時候，都會聽到呢類消極到噴血嘅講法。

喂！政府施政，推行教育政策，以本土優先係應份。我哋作為父母，為仔女爭取應有權益都係應份。現時嘅社會環境亂成咁，唔單止係教育，各方面都係，好清楚就係政府施政偏袒大陸人所致。作為父母想你嘅仔女有個學位，梗係要政府改變政策，以本土居民優先啦。和平理性，自求多褔，逆來順受，港共政府睬你有味！

我覺「自求多褔」呢種消極態度，只係會得到「自求得仆」，仆街個仆呀！最慘仆得最應嘅，唔係我哋呢班家長，而係我哋嘅細路呀！陰公！

（星期二檔案截圖）