尋晚睇完戲太攰，未寫得切感受。但呢套韓國戲，值得我寫返幾句，叫做《逆權大狀》。

香港人最近好迷韓國野。我認識嘅新一代，佢哋眼中嘅韓國係紙醉金迷嘅世界：K-POP、韓劇、電子產品，全部都係花花綠綠，閃令令咁。但原來，韓國人係1980年代都經歷過比香港更悲慘、更動盪嘅時期。當時嘅總統朴正熙（即係今日總統朴槿惠嘅老豆）被人暗殺死咗，而軍人全斗煥就奪權，行軍法統治，血腥戒嚴。反對嘅人就要死，唔係口輕輕拉下你坐監嗰種，而係士兵用機關槍掃射嘅血腥鎮壓，於是韓國進入咗好幾年黑暗嘅時期。年輕人用自己嘅淚水同血汗，喺氣油彈同防暴隊催淚彈嘅漫天烽火之下，要到1990年代先開始有民主。

扯得遠咗，講返套戲先。

《逆權大狀》係以已故南韓總統盧武鉉故事為藍本，講一個貧窮男人，點樣高中畢業，入唔到大學，但憑著自己努力考到律師嘅故事。前半段輕輕鬆鬆，令你覺得，人生好美好，好勵志，靠自己努力係會成功嘅「正能量」。我相信，呢部分好啱大部份香港人口味。

但其實唔係無轉折嘅。套戲鋪排到，主角宋律師同豬肉鍋店老闆娘嘅情誼。而宋律師喺自己掛住搵錢嘅同時，社會已經有唔少變化。當中喺豬肉鍋店一場戲，宋律師同做傳媒嘅舊同學，激辯社會矛盾，完全係我平日嘅心聲。而今日香港亦係處於呢個虛幻嘅物質世界，同埋悲慘而霸道嘅真實世界割裂之中。後來故事發展到，豬肉鍋店老闆娘個仔，被極權迫害，被老屈成共產黨而面臨起訴之際，宋律師終於打破昏睡，勇敢投身抗爭嘅大時代，單槍匹馬去為呢啲受殘忍警權迫害嘅學生去打官司。

成套戲呢個時候亦進入高潮，一面將代表人性醜惡嘅警察打人、虐待學生、老屈審訊嘅血腥方式幕幕呈現；一面就係宋律師為著正義，面對法官及主控官呢班衣冠禽獸，極力辯斥。套戲嘅結局唔係大團圓式嘅完結，呢個亦反映到現實；抗爭唔係做完一單就 happy ending，收工散水；而極權係繼續無恥地專橫，只有每一個人都鋌身而出先可以抵抗。（嘩，寫完呢段，仲以為自己係左膠添。）

之前睇過好幾位名家，尤其是竇蓉嘅文章，令我印像好深好深，佢話「戲中對白，真係每一個都講畀香港人聽」。我非常認同。尤其是我睇完之後，好想有個衝動，將平日一啲只顧自己生活嘅人，一一咁鬧醒（當然我做唔到啦，人地當我痴線撩交鬧）。但戲入面嘅舊同學男記者，的確有呢種火。佢識得講，「媒體今日講嘅野已經唔可信，你唔好以為你賺多兩個錢就好巴閉」。我真係好想同身邊每一個人講：醒下啦！香港已經沉緊船啦，你仲匿喺自我安穩嘅世界，係自己呃自己！

《逆權大狀》仲有好多細節，精彩對白，我都想 list 埋出嚟。為免趕客，唔詳細講解，但呢幾點，查實係我呢兩三年做咗鍵盤戰士之後，已經日日講，日日做：

1. 富二代去美國讀書，口中欣賞美國民主。但返到韓國，竟然覺得民主要國家收入增加三倍先做到。所以就唔好搞民主，搵錢先。
2. 宋律師唔想下一代生活喺荒謬嘅年代，所以今日要出嚟為下一代努力。
3. 以卵擊石。岩石係死嘅，雞蛋係生嘅，係雞蛋先可以孵化為生命。
4. 宋律師同車督察激辯咩係愛國。車督察認為自己執行任務，確保國家安全，拉啲顛覆份子就係愛國； 宋律師用憲法第一章話佢聽，愛國真正意義：國家嘅組成係人民，人民先係國家嘅主人。
5. 宋律師嘅 partner 勸宋律師唔好搞事，佢話社會動亂起上嚟，最多就移民走人（其實又係不負責任地逃避））

最後，我呢篇後記，我真係好想好想，同我朋友講，你哋入去睇呢套戲啦。睇完，我再次覺得香港人好低能，好幼稚。我無鬧錯，皆因你望下周圍嘅地區：韓國、台灣，甚至日本，人哋係自己爭取主權同民主返嚟。每個人，係經歷過苦難，佢哋有資格、有勇氣、有道理同人講，抗爭係必然嘅過程。但今日嘅香港，我身邊嘅朋友仲係擁抱著「香港唔可以亂」呢條總路線、「經濟要大躍進」、「政府係合法施政」嘅思維。呢三樣野，我稱之為「中產三面紅旗」，係害死成個香港，令香港慢性自殺嘅主要原因。

一日仲係盲目地相信，香港今日嘅抗爭係破壞社會嘅話，長遠嘅你只會見到社會更加無希望，就更加好似吸毒或者中咗慢性病咁，無藥可救。香港人終日笑人動亂、打架、暴動；其實香港自己都經歷過六七暴動，只係我哋呢代人冇身歷其境。以前香港社會安寧，只係因為香港好似BB仔一樣，有保母呵護住。而同齡嘅隔離屋小朋友，已經跑過跌過N次，留過血，企返起身。今日，人哋韓國同台灣終於長大成人啦。香港？只係一個企唔直嘅人，永遠只能夠爬係地下，等大陸去餵奶、餵食，食完就痾係地下。唔好忘記，今日你唔企起身，仲諗住爬爬下就過到日子，將來大陸一隻臭腳踩落嚟，以後唔會有人餵食之餘，腰骨都踩斷埋，就永無翻生之日。