政府連日下午都召開跨部門記者會，交代鉛水事件。昨日（7月14日）房屋署署長應耀康在記者會上就成為狙擊目標，被不斷追問會否因公佈資料內容前後不一而致歉。到今日的記者會，焦點就落在衛生防護中心監測及流行病學處主任程卓端身上。

昨日程卓端指出，若「一生拉勻」計，飲用水的含鉛量平均低於世衛標準，亦即每公升不多於10微克鉛的話，不會明顯威脅健康。今日在記者會上，程卓端被追問昨日的言論是否涼薄，程卓端就拒絕正面回應，只是再一次重申昨日的言論，又指概念「比較難明白」。

程卓端表示：「如果每天都飲水，其實如果佢真係喺飲嘅水當中，係有超出呢個標準嘅鉛含量，咁佢會累積。但如果佢每天都飲嘅，而有時佢係超標，有啲情況底下係正常嘅，符合呢個標準，咁佢拉勻嚟講，經過一生人飲用食水嘅時候，其實總嘅嚟講，佢吸入咗幾多鉛呢？拉勻嚟講，係唔超過呢個10呢，其實對於健康係冇明顯影響嘅。」

程卓端又指，如果在短時間內接觸大量鉛的話，就會即時對身體有影響，至於在啟晴邨及葵聯邨食水含鉛量只屬輕微超標，當局經風險評估後，認為不會引致急性鉛中毒，只要不是長時期飲用，就不用太擔心。

（無綫新聞截圖）