好多年之前其實好多人都係打一份朝九晚五好梳乎嘅工，不知不覺間就多咗一粒鐘變成朝九晚六。唔單止係咁，準時收工亦都由光明正大，變成一個偷雞摸狗嘅過程，有時只不過係想早少少收工，你都會發覺身後有數十對眼望實你咁樣，嗰種感覺就好似動物奇觀，你直頭會以為自己係瀕臨絕種動物，要望多幾眼。有時你會心諗，嘩，使唔使呀？都係收工啫，你係咪想我埋嚟同你講一聲「加油」？

或者你可以試吓套用《有你終生美麗》入面嘅數學大師（或者經濟大師）John Nash 嗰套博奕論去搏一鋪，呼籲所有員工一齊唔好 OT，但無論你班同事係理性抑或係唔理性嘅玩家都好，你嘅後果只有一個，就係金唔金髮，美唔美女都無你份。你只能夠好似 Prisoner's Dilemma 入面個賊咁洗定屎忽等坐監，亦即係洗定雙手等收信。你覺得呢啲篤背脊嘅行為唔單止顯露出班同事嘅淺薄、無知，而且冷血、涼薄，又當你醒起原來呢一間公司喺行內都算數一數二出名嘅時候，你不禁倒抽一口涼氣，為自己嘅前途擔憂。

權衡利害之後嘅你決定等，等一個好時機。直到某一日有三個同事同你講，佢哋發起咗一個名為「以愛與關懷解開領帶」嘅行動，希望同事明白到準時收工係幾咁重要，係一樣員工必須爭取嘅權利。過多幾日隔離 team 阿乜融又走埋嚟話佢哋要保飯碗、保貞操、反脫衣、反解帶。你真係諗到頭都爆，究竟呢兩班人搞乜鬼？然後嗰三個同事突然間醒悟，原來其他同事唔係咁諗，佢哋發現其他同事覺得佢哋個解帶行動模糊焦點，益晒大老闆。同時間你亦都質疑，你係咪開始唔了解呢一間公司，咪住，定還是你根本從來無了解過呢一間公司？及早抽身，你完全唔需要覺得恐懼同愧疚，更加唔存在誤判嘅問題。

到頭來你最後發覺原來辭職唔撈發動搵工先係最理想嘅做法，既方便又快捷。就喺你戰戰兢兢遞信話唔撈嗰一刻，你嘅電話就立刻響起，新公司叫你聽日返工，你即刻拎個銀包出嚟將一個月人工掟落舊老細塊面度走夾唔抖。第二日返新工，新老細竟然同你講佢最憎員工開 OT，喺呢一刻你感動嘅情緒已經去到一個難以用言語去形容嘅地步，你直頭覺得天上人間唔算最好。你呢一刻就只係想請呢個咁好嘅老細玩返一晚，唔好猶豫，相信佢收到你嘅邀請之後，除咗「嗚呀」之外都唔知應該講乜嘢好。恭喜你，你已經搵到一個踏入正常人思考領域嘅老細。

其實準時收工，又有乜好出奇喎。


畀個 Like 作者，佢未必會請你玩返一晚，但佢就真係會好開心：
https://www.facebook.com/HazySolitude


（圖片來源：小練 via Flickr）