《四個小生去旅行》未開播先出位，全賴謝賢打人事件。有人話咁嘅行為無非係想炒熱個勢，等開播嗰陣多啲人睇。當然絕對有咁嘅可能，但如衝突係真的話，咁就代表預告嗰陣嘅溫馨場面都係扮出黎，好似拍戲咁，當然仲有可能就係曾江病同謝賢嬲都係假的。真人騷本來係應該拍攝出當事人最真嘅一面，但電視台為咗收視肯定會喺節目要求拍攝者加鹽加醋。藝人虛偽人所共知，因此大家應該要清楚所謂嘅真人騷其實只係另類嘅劇集。
《Running Man》係好多人都鍾意睇嘅節目，大家鍾意佢夠搞笑，睇住主持同嘉賓為咗贏而搞盡腦汁，同經常出現蝦碌鏡頭，娛樂性滿分。幾年前佢哋嚟過香港嘅朗豪酒店拍攝，個遊戲係類似喺幾百個著住同一件衫嘅人當中，要搵到指定嘅物件。筆者就係嗰幾百位老臨嘅其中一個，你可能會覺得有機會近距離接近明星好正，但其實佢哋都只係會經過你，因為佢哋一早就知你唔係目標。除咗一大班收幾百蚊嘅路人甲乙丙之外，準備嗰陣其實仲有幾個TVB認得出個樣，但講唔出乜名嘅女藝人坐喺我哋後面，而遊戲當中要搵嘅嘢都好自然喺佢哋身上。遊戲開始之後當然會見到嘉賓搵咗幾個錯嘅目標，你呃我我呃你，最後有人終於搵到要嘅物品，但其實搵嘅過程只不過係扮出嚟，因為佢哋都知道佢哋要搵嘅目標喺咩位置，而成個節目流程都只係跟劇本去加強畀觀眾嘅刺激感。而且一個鏡頭背後其實有幾十部攝影機對住同一班人，到底有咩人可以喺咁多鏡頭面前，仲可以展現自己最真嘅一面？
《四個小生去旅行》冇咁複雜，起碼成個行程都淨係圍繞四個主持。但係如果成個節目都係四個人四圍觀光、影下相、食靚嘢，咁就變咗同一個旅遊節目無異。所以不時有啲衝突，發火互插幾句、但最後又你攬我我攬你咁「真情流露」先啱大家口味。不過點解通常呢類節目都會齊晒呢幾類元素？點解幾廿歲嘅曾江突然病到要坐輪椅，工作人員都唔暫停拍攝，畀佢休息好先，反而仲會搵四哥推住佢周圍玩？老人家有病痛一向可大可小，到底係TVB真係咁冇人性定係照劇本做，我比較相信係後者。早前喺無線播嘅《十二道鋒味》我睇過一集，其中一段內容大約係深夜謝霆鋒一個人喺廚房，整佢嘅招牌菜，然後畀一個女嘉賓無意中見到，仲要謝霆鋒教佢煮。個故事編排唔錯，但點解呢個咁無意嘅過程，會有攝影機拍到好似電影咁？其實大家都明白的。
我相信唔少人都知道，其實好多所謂真人騷都係假，但咁唔代表電視台隨隨便便咁搵四個人去旅行，照劇本咁玩就可以叫真人騷。我唔否認呢類節目有佢好睇嘅地方，用嚟消磨時間都算一流，但就算全部嘢都係假嘅，起碼唔好連個節目性質都想呃觀眾。
作者面書專頁：
https://www.facebook.com/