「人在中環」博客 CK 最近寫咗一個《我的四個撐建制朋友》系列，裡面講述嘅四個朋友，簡單啲嚟講就係安於現狀、既得利益者、認命主義同埋懶清高，我估有唔少朋友都發覺，原來呢幾種朋友同7-11一樣，總有一個喺你附近，如果你覺得身邊一個都無，反而要檢討下自己個社交圈子。你身邊嘅朋友有嘅特質唔一定只係得以上嘅一個，最極端嘅人可以四種都有齊。佢哋嘅行為亦都未必會好似系列入面嘅朋友咁會鬧返你轉頭或者去簽名反佔中，但你都總會聽過類似以下嘅幾句說話：

「搞咁多嘢為乜？而家生活咪好地地。」

「而家啲後生仔一日到黑就喺度示威抗議阻住個地球轉。」

「做呢啲嘢無用架，唔好白費心機啦。」

「我就無立場嘅，唔好問我，亦都唔好搞到我。」

好多時候同佢哋講開有關政治嘅話題，某程度上係仲辛苦過應付擺明車馬有鮮明立場嘅人。對住相反立場嘅人，都仲可以同佢哋決戰一百回合，到最後一拍兩散都未必會覺得可惜，甚至乎或者當大家都心知肚明嘅時候，反而會打默契波唔會走去講呢類話題。對住上面講𠴱四種小綿羊，你會好想拉佢哋埋自己嗰邊，但當直入主題嘅時候，經常會發覺好難入手，一般情況當你兜口兜面同佢講多一兩句有政治立場嘅說話，佢哋好容易俾你嚇親然後好自然抗拒接收，嚴重啲仲會開啟自衛模式去阻止你繼續講落去。呢一種方法，香港有一班所謂幫我哋爭取民主嘅人一直都做緊，仲做咗十幾廿年。

畢竟每個人嘅遭遇、性格、思維模式都唔同，有人有呢幾種心態其實無可厚非，亦都唔係一啲咩大奸大惡嘅想法。面對呢幾種人嘅時候，又係咪真係無辦法向佢哋傳訊呢？喺呢一方面好諷刺地居然係需要參考蛇齋餅糉呢種做法，箇中要訣其實好老土，俾多啲愛心，加幾分關懷，從佢日常生活投其所好，實行潛移默化。成件事又同談戀愛有幾分相似，試諗吓你會唔會同人約會食飯果陣走去同人講政治？對方真係啋你都生芒果，隨時即刻轉身頭也不回離開現場。

談戀愛呢回事，係無捷徑亦都唔包成功，所以要將政治理念傳播開去，亦都唔係一朝一夕而且係一件好容易令人氣餒嘅事。唔係容易做架，但你可以幻想下，如果有一日周融呃哂啲娘娘妹豬走，又或者男神狗公都被陳淨心李偲嫣之流勾哂去，你會唔會即刻衝滿鬥志？想做得好啲做多啲？一句到尾，傳訊係容易嘅話一早就有人做好咗。

談戀愛亦都係無秘笈嘅，如果有個人教到你點做，嗰個人簡直可以呼風喚雨，你個目標好可能已經俾佢搶走咗。同樣道理，傳播信念每個人都有適合自己嘅一套手法，同時每個受眾都有一套接收方式。如果走去問可以做啲咩、應該做啲咩，無人答到你，只可以講句唔好咁懶，你哋自己諗吓啦！

請支持本人的Facebook Page，謝謝：https://www.facebook.com/HazySolitude

（圖片來源：Hanna Nikkanen via Flickr）