一）還人情嘅小薯
每個camp最多嘅，大概就係其他camp嘅人，亦即係借將。
大學就係一個咁嘅環境，佢未必係朋友，莊員，但當你做一件事需要好多嘅人力嘅時候，就需要周圍借將。
呢個時候就係睇你以前簽過幾多人情出去，又有幾多人肯還。
所以每個ocamp入面，其實莊員永遠只係少數，更多嘅係一啲入嚟趁機還人情嘅小薯。

二）freeride嘅莊員
相反，當小薯們做到天昏地暗嘅時候，莊員都未必齊心合力架喎！
總有一兩個freeride嘅莊員，叫佢做野就無影，然後過幾日仲敢問番你搞掂未嘅賤人。
啊頂！最後呢啲人出現喺個camp度，咩都唔知，有時要take care番佢仲辛苦過照顧fm。

三）痴camp玩嘅oc
點解話佢痴camp玩呢？因為佢仲未俾錢．．．．．．
喂！快啲俾錢啊！次次叫佢俾錢佢都話下次先，又話無帶現金。
總之追佢還錢就同追債仔無分別，佢死唔俾你都無佢符。

四）叫唔郁嘅大小姐
佢多數都唔係自己join camp嘅，而係搞手邀請佢入camp，理由簡單不過：靚女。
大小姐當然有大小姐嘅自覺，因此佢俾fm更難搞，更任性。叫佢做野你諗都唔洗諗，一句唔舒服就番房訓。
最後佢嘅工作往往由其他人攤分，只能嘆一句：你的樣子如何，你的日子也必如何。

五）無人理嘅透明人
一個camp連組爸媽莊員mcoc大大話話幾十人，多數都分好曬一個個小圈子，總有一個人埋唔到堆，無野做嘅時候唯有一個人孤伶伶戇居居坐埋一二邊。
佢平時已經一枝公，入到camp都仲係一枝公，真係無陰公～

六）自閉嘅黑面神
佢好神奇，入到camp無人會叫佢做野，佢亦都唔會主動搵野上身。佢就係長期黑起塊面一尊佛咁企或坐喺度。
但如果fm夠膽鼓起勇氣過去問佢野，你會發覺，原來佢先係最熟個camp plan嗰個，無論係營地資料，定係邊度集合、幾時放飯、遊戲規則，佢都一清二楚。
冷漠只係佢嘅外表，其實佢內心都唔介意人煩佢嘅～

七）搵野「食」嘅獸父
佢入黎主要係搵野「食」，上至組媽下至組女。咁當然有高低手之分啦！高手完camp之後一腳踏兩船都冇人知，低手多數一出手就被人唱通街。

八）負責做門面嘅mc
雖然你成日見佢講野，但佢唔一定係大粒post。做得mc，除咗要講得兩口之外，最緊要梗係靚仔靚女啦！
佢係成枝ocamp嘅門面，睇落好似好輕鬆，但其實mc一啲都唔易做。佢一個錯漏，隨時就令到成個camp嘅rundown都會出事。
所以唔好睇佢靚靚仔仔，佢除左有外表之外，仲有一顆細心。

九）warm爆嘅後勤
呢個後勤唔係指執頭執尾嘅oc，而係指個啲身上帶住一套醫療裝備，又帶住一套軍用裝備，仲帶兩枝蚊怕水，三枝冰水，兩副啤牌，幾枝啤酒、秒錶、碼錶、膠布、膠袋。
你都唔知佢點帶咁多野係身，但係你知道當你需要啲咩嘅時候，搵佢就岩啦！無論醫療求生娛樂零食，佢實幫到你！
佢有係一回事喎！最warm爆嘅係佢無私嘅分享！

十）最後，點少得最重要個個，無錯，就係默默付出嘅你！
無論你係咩post都好，你都做好你嘅本分，不計回報。
ocamp永遠係咁，實有幫得手嘅人同激到你死嘅人，但正因為咁多人嘅出力同合作，先可以搞得成一個ocamp！