好多人都話香港人無夢想。但經過今個禮拜，仲有邊個敢話香港人無夢想？對於發筆橫財，香港人絕對係「敢夢，敢想」。

呢個禮拜我聽到嘅，全部都係好勵志嘅尋金故事。

第一個故事，叫《六合彩》。

「如果中咗1.5億，你會點用？」依個係我近日聽過最多嘅問題。

前幾日我飲茶時無意中聽到嘅對話。最先係一個上咗年紀嘅阿叔：「如果我中咗，扣除一半做善事，我會攞晒買楝貴價樓。」

隔離西裝友：「今時今日買樓唔係咁易呀，一億都未必買到凱旋門。」

呢個時候，另一位青年才俊忍唔住搭嗲：「我已經諗好嘞，買廿楝六至七百萬嘅樓，淨係收租都收到我笑。」

西裝友托一托眼鏡：「你都傻嘅，印花稅都交死你啦。」

「最穩陣都係買低價樓收租，唔便多，十間就夠。成本低，需求又大，呢家天水圍四百幾呎樓都差唔多成萬租，買價三百零萬……」

然後西裝友分享發達大計：「計我話，最好都係劏房……劏十幾廿間房。每間過萬租！仲唔賺到笑？……」

我心諗，乜你中咗奬啦咩。

另一個故事，叫《生活態度六》。

前幾日的 Whatsapp group。

「喂，你嗰面抽到幾多部﹖」

「好多人都抽到啦喎！」

「唉，個掣都灰咗，撳都撳唔到。」

「呢個係蘋果嘅 bugs 嚟！只要改咗下面句 script 就得！畀張圖你睇！」

「咁呀 XX 呢？之前你咪話抽到嘅？」

「抽就抽到，可惜都 cut 咗單呢。」

「點會呀！今朝先聽到你話收到 email。」

「有 email 都唔代表得，最終權利喺蘋果度！」

「你打條熱線問下蘋果啦！」

「唉……」（失望符號）

又係南柯一夢。

結果無人可以獨佔一億五千萬，拎唔到錢做唔到善事，才俊買唔到樓，西裝友劏唔到房，做唔到劏房波。Whatsapp group 裡面嘅朋友無個訂到生活態度六，生活態度依舊，仍舊相信自己可以搏番部「哎瘋熄匙」，可以分一杯羹、賺一筆都好。

唯一可以肯定既，就係聽日要返工返學。

不過呢兩個關於六嘅故事卻唔會因此而完結。小本生利、「刀仔鋸大樹」嘅發達故事一樣會借屍還魂，以各式各樣嘅面目出現，六六無窮，呢場尋金夢永遠都唔會完。

其實香港人鍾意發夢唔係問題，最緊要係識醒。六合彩同生活態度六唔中，大家都仲記得第日要返工；但係諗住靠自由行恩主會帶旺香港經濟嘅「黃金夢」、港共霸權會處處為你好，叫你「袋住先」兼同你「有商有量」嘅「中囯梦」，呢個夢又唔知幾時會醒呢？

最後，我喺度點唱一首歌：《夢醒時分》，希望顧住發夢而忘記現實嘅香港人快啲醒。