「人類總是要犯同樣的錯誤」，依句唔單止係高達嘅名句，直頭係世界嘅至理明言。好多人鍾意跟風，依排興乜就會一班人衝去玩衝去捧；又有好多人鍾意發明星夢，想一夜成名，想靠名氣靠網絡賺大錢。其實單憑依兩點就可以好肯定17依隻 app 遲早會收皮，只係我估唔到會嚟得咁快。
我部iPhone有兩隻已經落咗架嘅 apps，一隻係 Flappy Bird，一隻就係早兩日先下載左嘅17。只可惜下載左個 app 之後我都冇咩時間研究下點用，淨係開咗個帳號之後就冇再理過（我仲要用咗阿寶個頭像，你都咪話唔邪）。結果今朝一起身打開 facebook 就見到佢已經被下架，由係香港紅到上報紙到收皮應該唔超過一個星期，死因就正正係佢突然比太多人識。
佢有嘅 live 功能係吸引嘅地方之一，可以令到好多男人睇到女神嘅真面目。而同時唔知每吸引到幾多人睇你嘅 live 你就會有錢分，原理同 YouTube 差唔多，亦都係而家港女必備嘅 Instagram 所欠缺嘅功能。Facebook 好似都有，但就只限於名人玩。雖然依個功能好吸引，但同時亦都有好大嘅風險：你永遠控制唔到用戶會喺 live 播乜。當有錢搵同有名氣依兩個因素一齊出現，就會令好多女生想上位做女神順便搵錢，或者係搵錢順手做埋女神。一開始只要有個靚女開 live 已經可以好受歡迎，到後來觀眾習慣咗你就要諗多啲新意，就好似素顏示人咁，但同樣咁樣嘅驚喜都只可以維持好短時間，結果終於到咗有人開住 live 嚟自慰「盡地一搏」。而從來最多只會比「17+」年齡限制嘅蘋果又點會再容忍？馬上將你就地正法係可以預期嘅結果。
Instagram 因為只可以放片同相，同時佢又有審查，就算你放露點相好快你就會被刪相甚至鎖帳；Facebook 亦都係一樣，佢只係比名人玩 live 嘅原因，就係佢知道名人唔會拎自己嘅名氣嚟玩，自然唔會做好過火嘅舉動。但17呢？佢完全控制唔到用戶嘅行動，突然間有一個用戶大演春宮騷都好，一萬幾千個人圍觀拍手讚好佢都未必知道。好多嘢如果私下傳的話其實幾意淫都冇事，好似你喺 SKOUT 要傳送你嘅丁丁相比囡囡咁，只要你唔好用嚟做頭像就得。正如點解歐聯嗰排 Sopcast 嘅 link 特別難搵同特別易封？因為多咗一班忽然球迷，同時佢地又將非法睇波依件事傳得太揚囉。
要係互聯網成名最簡單嘅事就係做 ON9 仔。你唔見劉馬車而家幾咁受歡迎咩？而且好多網站程式禁絕色情暴力，但一定唔會禁止無厘頭白痴低能。如果你喺女的話你要做女神都係影返啲低胸硬照算啦。如果真係想靠扑野賺錢，一係做女優，一係做雞，應該搵得仲多。
作者面書專頁：
https://www.facebook.com/