今時今日的香港人大多嚮往高薪厚職、能夠買樓買車，過物質富裕的生活。為了過這些優質生活，不少人廢寢忘餐都要辛勤工作，務求能夠升職加薪，活得離地就好。

過往一期我們去到港島興東邨，了解獨立時裝造型師Lorraine的貼地故事。我們在香港不同的地方，尋找在不同的界別、範疇裡面獨當一面的人物，記下他們在香港的成長故事。今次我們去到大埔墟的拳館裡面，了解一個「離地」的回流香港人，從一位金融才俊，為了打泰拳而決定毅然離職的故事，以及大埔墟如何成為他成長的印記。

大埔區位於新界中部，據當地人指，昔日大埔為大森林，人跡罕至，行經的人必須「大步」而過，故此被稱為大步。其後更名為「大埔」。「大埔墟」最早是指林村河以北建立的墟市。直到清朝末年，七個非鄧氏村落於林村河南岸，即今日的富善街一帶建立名爲「太和市」的新墟市。隨著太和市的發展，當時的鄉民逐漸將太和市視爲大埔的墟市，並以「大埔墟」稱呼太和市，而林村河北岸鄧氏建立的大埔墟，則被改稱爲「大埔舊墟」。1913年，九廣鐵路通車，在太和市附近建立「大埔墟站」，成為至今的大埔墟。

今年32歲的林博敏（Billy）是土生土長的香港人，現時是一名全職泰拳選手兼私人教練，至今拳齡已有七年之久，每日幾乎都可以在大埔拳館見到他的蹤影。單看Billy外表，可能會讓人覺得外型俊俏，有著四份一蘇格蘭血統的他「淨係得個樣唔打得」。有所不知，Billy近年都贏過不少賽事，包括去年崑崙決（香港站）75KG冠軍、香港泰拳理事會2015年75KG金腰帶拳王、香港泰拳理事會2014年75KG金腰帶拳王，而以上2個金腰帶均以「技術性擊倒」勝出，可以稱得上是「香港靚仔拳王」。

為減肥學拳變拳王　接觸泰拳一試就愛上

剛剛從加拿大回流香港的Billy，經常與當時的朋友外出消遣，又煙又酒的他，體重飆升，自覺「走樣」的Billy在爸爸鼓勵的情況下，決定到大埔墟的ATMA Fitness Centre學泰拳減肥。他原本只打算做運動減肥，開始上課之後，發現泰拳非常有趣，Billy很自然就繼續學下去。

「開頭係為咗減肥先嘅，其實我自己無唸過打泰拳嘅，啱啱喺加拿大返嚟嘅時候就啱啱開始做嘢啦，踏入社會啦，又煙又酒，肥咗走咗樣，跟住老豆就係大埔搵到呢間拳館（ATMA），咁就開始咗學泰拳。一入到去個師父（周明逵）同我年紀又差唔多，大我一兩歲，又傾得埋，咁跟住咪開始試下打拳囉。『嘭嘭』聲，打下打下又好似幾過癮咁喎，自己又有啲力咁樣本身，咁咪開始鍾意（打泰拳）囉。」

第一次踏入這家位於大埔的泰拳館，遇上了與自己年紀相近的師父周明逵，年紀相近容易溝通，加上自己對泰拳有一些天份，零武術底子的他便開始認認真真學泰拳。相信他自己都沒有想過，七年過後，Billy已經成為一星期練足六日，每天兩課，星期日沒有練習時都會運動「Active Rest」的拳手。

「啱啱開始嘅時候純粹覺得『啊，幾好玩喎』又可以打人呀，姐係叫做攞正牌打人啦，同埋我幾鍾意個挑戰性囉，姐係譬如我要打到你，但係又盡量唔好俾你掂到我，咁一開始我係覺得幾好玩囉。」

金融才俊毅然離職成全職泰拳手　追一個泰拳夢

在Billy成為香港拳王之前，原來曾經是一名高薪厚職的金融才俊，每天工作輕鬆，收入足以讓他揮霍，經常與一大班朋友晚上外出飲酒消遣、「晚晚開枱開香檳、揸跑車」的紫醉金迷生活。然而這些生活對於Billy而言，並沒有太大的吸引力。當時天天穿西裝，上班工作的金融才俊，開始認為這樣的生活無法給予他足夠的挑戰和成就感，反而讓他覺得厭煩、討厭每天帶上面具去與他的「職場朋友」聯誼、給老闆「擦鞋」。

「第一份工作，我一返到嚟其實係做錄音嘅，係Mark Lui間公司Studio度做錄音，做咗一排，覺得就真係未係自己好enjoy嘅嘢。咁就兜兜轉轉其實做咗好幾樣嘢，做咗War Game場教人玩汽槍啦、跟住又做咗金融啦，做啲貿易呀，飛嚟飛去做考察，錢唔係話搵唔到，其實好舒服嘅添嗰陣時個生活，咁但係硬係覺得有少少好似行屍走肉咁囉。日日淨係返工放工，無一個真正嘅挑戰性係度，覺得自己就係好似機械人咁樣。咁我覺得泰拳帶到俾我嘅嘢就係一種挑戰，Make me feel alive。我鐘意嗰種熱血嘅嗰種感覺囉，無論係輸或者贏。」

初時邊上班邊打拳的Billy，參加不少小型賽事、館內賽等等，成績不俗，便開始進軍公開賽，頭幾次參加公開賽仍然是以業餘身份參加。比賽一場比一場的挑戰越來越大，對手一場比一場更強。此時工作、泰拳對Billy而言，變得難以兩事兼備。想進步更多的他，便決定辭職，投入全職泰拳拳手的生涯。

「因為其實知道架，你冇可能返朝九晚五，同全職嘅泰拳拳手對打架。人地每兩個禮拜或者三個禮拜就已經打一場架喇，咁變相佢一年係打緊廿幾場賽事，但係我地香港唔係，我地可能個籌備嘅時間呀、自己要攞錢買啲Supplement呀、自己俾錢睇醫生呀、抽時間出嚟操拳呀、仲要返工呀、唔好彩可能要俾埋家用呀、供樓供車。咁你有好多呢啲責任要Take care，你好難全心全意去打拳囉。」

由金融才俊，突然成為拳手，收入減少至幾千元不等。相比平日穿西裝上班，變成每日「打打殺殺」、不時受傷的他，讓Billy的媽媽有亦都有些擔心，甚至有些微言。幸好爸爸非常支持他的決定，到Billy贏金腰帶的時間，媽媽跟爸爸亦都非常為兒子驕傲。

「我覺得三餐無休，養得起屋企人，咁我覺得好夠啦。唔洗餐餐大魚大肉，可能一年去一兩次旅行，唔算太過份丫，比正常生活好少少已經好足夠。」

加拿大回流最愛大埔近郊　日夜訓練與一班大埔人成兄弟

應該沒有人想到，在大埔圍村長大的Billy，中學開始到加拿大留學，直到畢業才回流香港的混血「竹升仔」。廣東話居然句句流利，對自己出生、成長的地方大埔，更加非常鍾愛。

自小在圍村長大的他，即使初中就到加拿大留學，但仍然覺得大埔是他的家。最喜歡小時候大埔圍村村民，因為村裡的人少，大家都認識，很多朋友都是圍村人、大埔人。回港後雖然圍村外來人增加了不少，但對Billy而言，大埔仍然是他喜歡的地方，又坦言不太喜歡石屎森林，近郊的大埔綠樹林蔭，如非必要，他每天生活都圍繞著大埔這個地方。

「嗰種生活方式嘅人，比到我嘅感覺係好假、好虛無，姐係喂有錢嘅就坐埋『圍威喂』—齊去happy一齊開Champagne飲酒，媾女又好乜都好啦，玩又好，開跑車，乜都好。有錢就叫你大佬，無錢就叫你契弟，我唔鍾意呢啲人。」

恰巧，在大埔墟裡面，Billy遇上了這家拳館，認識了一班和他「日打夜打」的兄弟。認識拳館的兄弟之前，Billy對於過 往工作認識的朋友不太認同，指那些人只向利益看，只有金錢享樂，並非真朋友。「你有難唔開心嘅，佢地一定唔係嚟陪你去傾計嗰啲人囉。淨係見到有利益嘅人就利用，我覺得嗰啲人好慘。我唔想搵到錢而無咗人性嘅一面。」

捨棄舊朋友，去到拳館與一班志同道合的人一起練習，久而久之讓他們成為了兄弟。「可以叫做不打不相識，因為我地嗰陣時，難聽啲講係日日係度互毆。就比賽成班輪流似係度你打我我打你，成班友得閒又圍埋係度打機呀、食飯呀，咁啱又全部都係大埔人。」即使對打受傷亦不會遷怒於大家，反而會笑對方不做好防守，Billy坦言好兄弟就是會互相恥笑，不會放在心上，反而面對其他拳館的比賽，更加團結，為拳館爭取好成績。Billy又指與拳館一班兄弟，練習過後必定會在同一家茶餐廳，一起喝杯奶茶。「明明係無嘢做，明明都係同一杯奶茶，但都要一齊坐係果度，飲下嘢傾下計。」

久休復出迎戰泰國職業拳手　面對勝負需毋忘初心

「就算你操八個鐘一日，無話你操足八個鐘一日就一定贏架場比賽，永遠都有啲係擂台上你預料唔到嘅嘢。想放棄嘅時候你咪同身邊啲朋友、教練傾下偈囉。有陣時會唔想練落去喇已經，咁咪同佢地傾下偈，咁通常佢地都會cheer me up嘅。」

Billy事隔一年，再次參與比賽，在「YOKKAO 25 & 26 Muay Thai」面對泰國職業拳手，表現未如自己理想，但仍然未減他對泰拳的熱情。面對贏輸，Billy有一套自己想法，以平常心去接受，毋忘當初自己選擇泰拳的原因。

「贏其實好多因素，你可能好彩或者你真係操到好足，姐係呢兩樣都會係其中一個元素。輸未必係你自已操得唔夠，贏同輸你都要平常心咁去接受。贏係當然好啦，贏一定係開心嘅咁，輸係唔好受架喇，如果輸就就咁褶埋嘅話，咁你應該問返自己你點解要開始。每一場比賽贏同輸都好我都會問自己點解要揀呢條路，就咁輸咗就放棄嘅話其實You’re not meant to be here。」

Billy更指自己希望能夠參加更多自己一直想參加的比賽、代表香港參與國際賽事等等，與不同的職業拳手切磋。「希望34、35歲前可以打哂自己想打嘅比賽，可以搵到職業、國際性拳手切磋下。」

對於喜歡的事情，無論輸贏、放棄高薪厚職、終日操練、遇上任何困難，都會繼續去做的香港職業泰拳拳手林博敏，在大埔墟泰拳館的成長故事。會不會讓你聯想到，屬於你自己的一個故事呢？