小妹早前曾推出兩篇「TVB《實習天使》離譜劇情大解構」，結果例牌見到有啲留言批評，指小妹不應對膠劇諸多挑釁，又有人鬧我變相幫CCTVB宣傳，講真我邊度有咁大威力丫。事實上，身為一個護士，我cap圖笑CCTVB，純粹係因為我唔想再聽到有人同我講：「姑娘你識唔識架！無綫啲電視劇唔係咁講架喎！」

政府早前就「網絡23條」，於政府新聞網同報章刊出「事實與真相」列表，我又有樣學樣，整番一個護士界「事實與真相」列表，解答一下大家對護士界嘅疑問。

Q1. 現實世界係咪真係有啲咁恐怖嘅 Mentor？
答：有！而且恐怖過佢好多都有！有啲 Mentor 真係好似洪永城咁，嚴格而且鬧人不留餘地。如果做錯事真係會俾佢哋鬧到喊架！不過又咁講，嚴師出高徒嘛！你為咗唔想再俾佢鬧，你真係會謹慎好多架！


Q2. 醫生說你錯你就是錯？
答：嗱，真係好睇你上司信你定信個醫生。以小妹嘅經驗係…如果無實際證據證明自己清白，經理係會信醫生嘅，特別係如果個醫生好高級！有時真係食死貓都食飽。


Q3. 病房係咪真係可以唔要護士，只請健康助理呢？
答：我肯定現實世界其實有好多醫生係咁諗，甚至有醫生講過同樣嘅說話！如果真係無護士，醫生就要自己幫手幫病人沖涼轉身換片，自己巡房，自己派藥，自己洗傷口，自己幫病人插喉，自己跟進驗身報告，顧慮埋家屬等等。我估…佢應該兩日後就後悔。


Q4. 係咪真係按章工作？
答：小妹就真係未聽過，現實如果護士真係對醫生不滿，只要事無大小都call佢同佢講，佢都已經會覺得好煩！
利申：我未試過！我無咁做唔係怕得罪醫生，只係怕我上司鬧啫。


Q5. 甚麼時候需要進行心肺復甦法（CPR）？
答：劇中首十集就至少出現過五次心肺復甦的情節，但每次病人的症狀都有點不同，其中一次更只是血含氧量很低。其實心肺復甦法只適宜用於「沒有心跳」的病人身上！並不是你想做就做！


Q6. 返Night古怪事，係咪真係有架？
答：又真係真架喎！小妹工作嘅地方都有類似嘅禁忌，紅豆沙同芝麻糊一定唔得！不過雞腳同麵包小妹就未聽過。


Q7. 甚麼時候需要體外心臟去顫器呢？
答：簡直係一百萬嘅題目！如果無學過齋睇電視，十個觀眾有十一個都會答：個心停咗咪電返醒佢囉！小妹而家就話你知：錯！其實部機係用嚟電停個心架！正常心臟係會自己跳嘅，但係個心可能會傻咗亂咁跳，呢個時間用心臟去顫器，就好似reboot電腦咁，希望可以回復正常心跳。



相關連結：
TVB《實習天使》離譜劇情大解構（一）
http://www.passiontimes.hk/article/12-02-2015/27225

TVB《實習天使》離譜劇情大解構（二）
http://www.passiontimes.hk/article/12-05-2015/27277

（實習天使截圖）