作為生於觀塘，長於觀塘，觀塘讀書，而家喺觀塘工作嘅中佬，我睇見「每日屌觀塘老母」專頁，一睇覺得幾好笑；再睇就覺得，版主你都幾撚無聊架喎。

唔知係版主及一眾＿登仔未見過世面定搏出位，覺得觀塘塞車阻你返屋企就犯下彌天大罪，屯門牛返觀塘工塞車就世界末日，觀塘空氣唔好多廢老密度高就好撚cyberpunk，鴻圖樓好經典，觀塘食飯又貴又逼人云云，然後要大聲yell out？

作為觀塘L，我好想問︰有得選擇，你想去將軍澳工業邨定馬鞍山食lunch？定係想去數碼港、白石角做IT上等人？講塞車，如果你住香港仔，係咪已經激爆咗血管？講污染，荃葵青係咪差過觀塘呢？

作為睇住觀塘不斷改變嘅老街坊，先講塞車…係，觀塘塞車係同道路規劃有關。一個原本係自給自足嘅，原本係地鐵總站嘅「新市鎮」（by 50年代definition，官塘係「新區」，第一代衛星城市），N年後因一大個將軍澳新市鎮，一條海底隧道，N個區內新發展區，公屋地域不斷重建，工業區變商業區，而變成東九龍交通大動脈，呢個根本係規劃問題。政府只係不斷重劃舊區用途，同時建立新區，冇考慮過交通承受力，結果大企業將後勤甚至營運總部搬晒去觀塘，小公司進駐又搬去觀塘，新界人要返觀塘工，將軍澳人又要出城，秀茂坪同藍田人又要落山，仲有三彩同樂華邨居民呢？結果梗撚係jam晒啦！但係咪冇辦法解決呢？政府有冇諗過開設巴士專線限制車流呢？又或者，進一步擴建觀塘站，又或者開辟單車路呢？仲有海上運輸呢？點解咁大個碼頭，政府冇諗住好好運用？再退50步，香港交通網絡根本應付唔到咁多車，返工放工你去九龍城同香港仔行一轉，有邊度係唔塞？獅子山隧道同大老山隧道亦唔好得幾多。仲有紅隧呢？如果塞車就要＿老母，咁大家真係好唔得閒。

而且，我已經冇提日日塞爆嘅屯門公路，以及塞起來會超大鑊嘅吐露港公路。

講污染，觀塘空氣差係因為人多車多大廈高，trap死地面廢氣。同理，政府有冇正視交通問題？答案係冇嘅。但再問多句，銅鑼灣空氣係咪又好啲？幾年前喺港島返工，行落銅鑼灣食飯，咪又係要聞同一種廢氣？高樓大廈trap住過量廢氣，路人變晒吸塵機。好啦，去到將軍澳工業區，草都唔多條，望出個海，望住對面嘅墳場，天氣再好，個天都係灰藍色架，大佬。真正嘅藍天，係要去到東京、墨爾本同花蓮先見到。唔講外在因素，正苦一日唔正視規劃、交通同人流對空氣質素嘅影響，呢個死結就無法解決。區區規劃都錯，咁你想點＿樣先？

講食，如上面所言，數碼港係咪有啖好食呢？咁將軍澳呢？搭廠車出到popcorn，俾你坐多一個站去坑口，餐廳根本一＿樣，都係同一堆大集團。去到數碼港你仲死，直頭無得你選擇咁濟。白石角叫做好少少嘅，但選擇同樣唔多。打觀塘工，食lunch已經相當幸福，平有茶記同工廠飯堂，想食好少少又有工廈餐廳。你去過Sujata Cafe未？又去過桔梗未？就當你一定要食黃店，幫襯過土城未？珠記又去過未？以前仲有非常出色嘅船長船麵。由豪食到平價外賣，觀塘樣樣齊，除駱駝漆外仲有成業街一堆工廈同海皮，駿業街同碼頭熟食樓。小弟亦試過在廣播道返工，想食餐好起碼要坐一程車或行15分鐘去樂富或又一城，你咁都要問候人娘親，我咪要剷起人地全家？建議樓主不如去多幾區返工先再complain啦。

而觀塘本身，亦曾經係藝術家、樂隊、創作人聚集處；同時，亦有唔少中小型公司進駐，因為租金相對地平，交通配套相對方便，為呢個城市帶來唔少活力。

觀塘嘅發展同問題，根本係香港嘅縮影，區區都有近似嘅狀況。窮人天水圍、黃大仙、深水埗有唔少；流動人口密度高，銅鑼灣、旺角、尖沙咀一樣係咁；空氣差，就差唔多所有市區都係。區內多「廢老」，係地區發展先後問題，而且公屋林立，吸納更加多長者，但你去到深水埗同黃大仙，難道又好年輕活潑嗎？區內環境欠佳，係食環處事不力，葵涌同荃灣又唔見得特別好。車多路窄，周街有人違泊，難道中西區唔係嗎？講污染，我就唔信工業區得觀塘一個。

要觀塘一個老母受晒靶，係好唔公平，亦無視區內仍然值得你珍重嘅地方。行落海濱公園，其實好適合跑步，散心傾偈亦好舒服；租樓住月華街或功樂道，靜中帶旺，而且四通八達（特別係月華街），生活質素唔會差得過又一邨。遠少少去到Megabox，亦有IKEA可逛逛。而瑞和街街市，更係而家買少見少嘅舊式街市街。真係可惜嘅，係市建局強行將舊區士紳化，趕走無數小販小店，連裕民坊三大牛腩麵家都走埋；活化工廈令租金不斷上升，逼走有心經營嘅食店同藝術工作室。

無意一味唱好觀塘，只係希望大家唔好嘩眾取寵，觀塘有嘅問題，其他區份一樣有。冇乜好驚奇，因為香港整體規劃就係有問題。